Ўзбекистонга ташрифи бекор қилинган Япония Бош вазири истеъфога чиқмоқда

Япония Бош вазири Фумио Кисида узоқ йиллар ҳукмронлик қилган Либерал-демократик партия (ЛДП) раҳбари сифатида кейинги ойда истеъфога чиқиши мумкинлиги ҳақидаги баҳслар кучайиб кетгач, иккинчи муддатга номзодини қўймасликка қарор қилди. Бу ҳақида CNN хабар қилди. 

"Шаффоф ва очиқ сайловлар, эркин ва қизғин баҳс-мунозаралар ҳар қачонгидан ҳам муҳимроқ. ЛДП ўзгаришини кўрсатиш учун энг муҳим қадам — менинг истеъфога чиқишимдир", 

дейди матбуот анжуманида Кисида. 

Эслатиб ўтамиз, 2024 йил 9 август куни Қозоғистон Республикасининг Остона шаҳрида Марказий Осиё мамлакатлари ва Япониянинг 450 дан ортиқ вакилларини бирлаштирган "Марказий Осиё + Япония" бизнес-форуми бўлиб ўтган эди.

Тадбир доирасида Кисиданинг ташрифи ҳам режалаштирилган, бироқ Япония метеорология агентлигининг Тинч океани жануби-ғарбдан Япониянинг марказий қисмигача чўзилган ҳудудида юзага келиши мумкин бўлган кучли зилзила хавфи ҳақида огоҳлантириши сабабли Фумио Кишида 9−12-август кунлари Қозоғистон, Ўзбекистон ва Мўғулистонга режалаштирилган сафарини бекор қилганди. 

Шундан сўнг Президент Шавкат Мирзиёев Фумио Кишида билан телефон орқали мулоқот қилган. У мамлакатда кутилаётган сунами юзасидан хавотир билдирган ва Япония бош вазирининг Ўзбекистонга ташрифини кечиктириш қарорини "тўлиқ тушунишини" билдирган.