Аҳоли саломатлиги наркожиноятлардан ҳимоя қилинади

Жиноят кодексига янги бўлим киритилади

Ҳужжатга кўра, Жиноят кодексига «Аҳоли саломатлиги ва миллат генофондига қарши жиноятлар» номли янги бўлим киритилади. Унга мувофиқ, аҳоли саломатлигига таҳдид солувчи наркожиноятлар учун жавобгарлик кучайтирилади.

Шу жумладан, қуйидаги қилмишлар учун 20 йилгача озодликдан маҳрум этиш жазоси белгиланади:

• наркожиноий уюшма ташкил этиш ва унинг фаолиятини таъминлаш;
• гиёҳвандлик воситаларини уюшган гуруҳ томонидан трансчегаравий ёки интернет орқали ўтказиш;
• ҳокимият ваколатларини суиистеъмол қилиб наркожиноятларга ҳомийлик қилиш;
• ғайриқонуний нарколаборатория ташкил этиш.

Маъмурий жавобгарлик кучайди

Фармонга мувофиқ, гиёҳвандлик воситаларини жамоат жойларида истеъмол қилганлик учун 15 суткагача маъмурий қамоқ жазоси жорий этилади. Бу аҳолининг соғлом турмуш тарзини таъминлашга ва жамоат хавфсизлигини мустаҳкамлашга қаратилган чора ҳисобланади.

Жиноят учун жазо икки бараваргача оғирлаштирилади

Наркожиноятларнинг содир этилиши ва қайта содир этилишининг олдини олиш мақсадида қатор қилмишлар учун жиноий жавобгарлик икки бараваргача оғирлаштирилади. Улар қаторида:

• гиёҳвандлик воситаларини кўп миқдорда тайёрлаш, сақлаш, ташиш ёки тарқатиш;
• кучли таъсир қилувчи моддаларни кўп миқдорда ва такроран муомалага киритиш;
• одам ўлимига сабаб бўлган ҳолатларда наркоманияга жалб этиш.

Ёшларни ҳимоя қилиш чоралари

Фармонда вояга етмаганлар ва ёшларни наркожиноятлардан ҳимоя қилишга доир қўшимча қоидалар ҳам белгиланди.

Эндиликда:

• вояга етмаган шахсларга нисбатан ёки улар иштирокида содир этилган наркожиноятлар оғирлаштирувчи ҳолат сифатида баҳоланади;
• таълим муассасалари ёки болалар дам олиш оромгоҳларида гиёҳванд моддаларни тарқатиш учун жавобгарлик икки бараваргача оғирлаштирилади.

Бундан ташқари, айрим наркожиноятларни содир этган шахслар жазони муддатидан олдин шартли равишда озод қилиш ҳуқуқидан маҳрум этилади.