АҚШ суди Ўзбекистон фуқароларига иммиграцион визалар тақиқини бекор қилди

Судья Жаннетт Варгас Давлат котиби Марко Рубио ушбу чекловни жорий этишда ўз ваколатларидан ошган, деган хулосага келган. Суд қарорда мазкур сиёсат қонунга зид эканини қайд этиб, уни бекор қилган.

Шунингдек, суд визани рад этишга фақат ушбу сиёсат асос бўлган ҳолатларни ҳам бекор қилган.

Бироқ АҚШ ҳукумати қарор устидан апелляция бериши мумкин. Шу сабабли қарорнинг амалиётда қандай тартибда ва қачон тўлиқ қўлланиши ҳали аниқ эмас.

Нима ўзгарган эди?

АҚШ Давлат департаменти 2026 йил 21 январдан бошлаб 75 давлат фуқароларига иммиграцион визалар беришни вақтинча тўхтатган эди. Рўйхатга Ўзбекистон, Қозоғистон, Қирғизистон, Россия, Беларусь, Озарбайжон, Арманистон, Грузия ва Молдова каби давлатлар ҳам киритилган.

АҚШ маъмурияти чекловни мигрантларнинг ижтимоий нафақалардан фойдаланиши ёки жамият учун молиявий юкка айланиши эҳтимолини камайтириш зарурати билан изоҳлаган.

Муҳими, чеклов иммиграцион визаларга тааллуқли бўлган. Туристик, талабалик ва бошқа ноиммиграцион визалар бу қарор доирасига кирмаган. Давлат департаментининг маълумотига кўра, таъсирланган давлатлар фуқаролари ариза топшириши ва суҳбатдан ўтиши мумкин бўлган, аммо визаларни бериш тўхтатилган эди.

Энди суд қарори ушбу сиёсатнинг ҳуқуқий асосини бекор қилди. Бироқ ҳукумат апелляция бериши мумкинлиги сабабли, Ўзбекистон фуқаролари учун иммиграцион визалар бериш жараёнининг қачон тўлиқ тикланиши ҳозирча очиқ қолмоқда.