AQSH sudi O‘zbekiston fuqarolariga immigratsion vizalar taqiqini bekor qildi

udya Jannett Vargas Davlat kotibi Marko Rubio ushbu cheklovni joriy etishda o‘z vakolatlaridan oshgan, degan xulosaga kelgan. Sud qarorda mazkur siyosat qonunga zid ekanini qayd etib, uni bekor qilgan.

Shuningdek, sud vizani rad etishga faqat ushbu siyosat asos bo‘lgan holatlarni ham bekor qilgan.

Biroq AQSH hukumati qaror ustidan apellyatsiya berishi mumkin. Shu sababli qarorning amaliyotda qanday tartibda va qachon to‘liq qo‘llanishi hali aniq emas.

Nima o‘zgargan edi?

AQSH Davlat departamenti 2026 yil 21 yanvardan boshlab 75 davlat fuqarolariga immigratsion vizalar berishni vaqtincha to‘xtatgan edi. Ro‘yxatga O‘zbekiston, Qozog‘iston, Qirg‘iziston, Rossiya, Belarus, Ozarbayjon, Armaniston, Gruziya va Moldova kabi davlatlar ham kiritilgan.

AQSH ma’muriyati cheklovni migrantlarning ijtimoiy nafaqalardan foydalanishi yoki jamiyat uchun moliyaviy yukka aylanishi ehtimolini kamaytirish zarurati bilan izohlagan.

Muhimi, cheklov immigratsion vizalarga taalluqli bo‘lgan. Turistik, talabalik va boshqa noimmigratsion vizalar bu qaror doirasiga kirmagan. Davlat departamentining ma’lumotiga ko‘ra, ta’sirlangan davlatlar fuqarolari ariza topshirishi va suhbatdan o‘tishi mumkin bo‘lgan, ammo vizalarni berish to‘xtatilgan edi.

Endi sud qarori ushbu siyosatning huquqiy asosini bekor qildi. Biroq hukumat apellyatsiya berishi mumkinligi sababli, O‘zbekiston fuqarolari uchun immigratsion vizalar berish jarayonining qachon to‘liq tiklanishi hozircha ochiq qolmoqda.