Ayrim Isroil amaldorlari urushni cho‘zmoqchi — AQSH vitse-prezidenti

AQSh vitse-prezidenti Jey Di Vens 15-iyul kuni boshlovchi Jo Rogan bilan bo‘lib o‘tgan podkastda aytishicha, Isroil hukumatining ayrim vakillari AQSh jamoatchiligini Eron bilan urushni yakunlash bo‘yicha kelishuvga qarshi chiqishga undagan.

Vens avvalgi chiqishlarida ham Isroil hukumati siyosatini tanqid ostiga olgan. Ko‘pchilik uni kelajakda prezidentlikka ehtimoliy nomzod sifatida ko‘radi. AQSH va Isroil o‘rtasidagi ochiq kelishmovchilik esa tobora oshib bormoqda.

Vens o‘tgan oy Eron bilan urushni to‘xtatish bo‘yicha erishilgan kelishuvni himoya qildi.

AQSH va Isroildagi tanqidchilar ushbu kelishuv Eronning raketa dasturini cheklamaganini, yadro inshootlari yopilishini nazarda tutmaganini hamda Isroilning Livandagi “Hizbulloh” harakatiga qarshi harbiy amaliyotlarini cheklab qo‘yganini ta’kidlamoqda.

“Men shubhasiz bilamanki, Isroil hukumati ichida AQSHni ushbu kelishuvdan qaytarishga urinayotganlar bor. Chunki ular harbiy harakatni davom ettirishni istaydi”, — dedi Vens.

Vitse-prezidentning aytishicha, u Isroil hukumatining ayrim a’zolari bilan yaxshi munosabatda. Biroq ularning parlamentida AQSH jamoatchilik fikrini o‘zgartirish va urushni noma’lum muddatga cho‘zishga urinayotgan shaxslar ham borligi haqiqat.

Vens iyun oyida ham Eron bo‘yicha kelishuvni tanqid qilgan Isroil vakillariga keskin javob qaytargan edi. U prezident Donald Trampni Isroilning yagona haqiqiy ittifoqchisi deb atab, AQSH Isroilga milliardlab dollar mudofaa yordami ko‘rsatishini eslatgan.

Isroilning yuqori martabali amaldorlari anonim tarzda kelishuv shartlari Isroil manfaatlariga mos emasligini bildirgan. Ularning fikricha, hujjatda Eronning yadro va ballistik raketa dasturlari bilan bog‘liq asosiy xavotirlar inobatga olinmagan.

Vensdan, agar Isroilning ta’siri bo‘lmaganida AQSH Eron bilan so‘nggi urushda ishtirok etarmidi, deb so‘ralganda, u: “Mening fikrimcha, ha, albatta”, — deb javob berdi.

“Prezident Isroilning har qanday ta’siridan qat’i nazar, Eron yadro quroliga ega bo‘lmasligi kerak, degan pozitsiyada. Men ham bunga qo‘shilaman”, — dedi Vens.