Исроил АҚШга бўйсунмайди – Исроил вазири

Унинг сўзларига кўра, Дональд Трамп томонидан қўллаб-қувватланаётган ҳар қандай келишув Исроил учун мажбурий эмас.

«Трампнинг битими бизни мажбурлаб қўёлмайди. Исроил АҚШга бўйсунмайди, биз мустақил ва суверен давлатмиз», — деб ёзди Бен-Гвир Х (собиқ Twitter) ижтимоий тармоғида.

Вазирнинг таъкидлашича, у Исроил хавфсизлигини ҳисобга олмайдиган ҳеч қандай келишувни қўллаб-қувватламайди.

Бен-Гвир, шунингдек, «Ҳизбуллоҳ» тўлиқ қуролсизлантирилмас экан, муросага бориш мумкин эмаслигини билдирди.

Унинг фикрича, Исроил армияси назоратга олган ҳудудлардан чекинишга ҳам асос йўқ.

«Ҳизбуллоҳнинг тўлиқ қуролсизлантирилишидан камроқ бўлган ҳар қандай муросага боришга ҳаққимиз йўқ. Жангчиларимиз назоратга олган бирорта ҳудуддан ортга чекина олмаймиз», — деди у.

Бен-Гвир баёноти якунида Исроил АҚШ билан яқин муносабатларни қадрлашини, бироқ мамлакат мустақил сиёсат юритишини таъкидлади.

«Биз АҚШни яхши кўрамиз ва президент Трампдан миннатдормиз. Шунга қарамай, Исроил давлати — қўғирчоқ давлат эмас», — деди Исроил миллий хавфсизлик вазири.