Tramp Kongressga Eron bilan urush qayta boshlanganini bildirdi

AQSH prezidenti Donald Tramp Kongressga Eronga qarshi harbiy harakatlar 7-iyul kuni qayta boshlanganini rasman ma’lum qildi.

Ma’muriyat bu xatni Kongress roziligisiz mintaqada yangi 60 kunlik harbiy urushni boshlab beruvchi hujjat sifatida baholamoqda.

10-iyul sanasi bilan yozilgan va Reuters ko‘rgan maktubda Tramp shunday deydi:

“Men ushbu harbiy harakatga amerikaliklarni hamda AQSHning milliy xavfsizligi va tashqi siyosiy manfaatlarini himoya qilish vazifasiga muvofiq ravishda boshchilik qildim”.

Maktubda Trampning harakatlari, jumladan, 7-aprel kuni e’lon qilgan va keyinchalik uzaytirilgan ikki haftalik sulh, shuningdek, mojaroni diplomatik yo‘l bilan hal etishga qaratilgan ma’muriyat sa’y-harakatlari bayon etilgan.

Shuningdek, AQSH prezidenti 17-iyun kuni Eron bilan imzolagan anglashuv memorandumini eslatib, Eron Hormuz bo‘g‘ozida harakatlanayotgan tijorat kemalariga hujum qilish orqali ushbu kelishuvni buzganini aytgan. Aynan shu holat Islom Respublikasiga qarshi zarbalarni qayta boshlashga sabab bo‘lgan.

Urush vakolatlari to‘g‘risidagi qonun

AQSH Konstitutsiyasiga ko‘ra, urush e’lon qilish vakolati prezidentga emas, balki Kongressga tegishli. Biroq AQSH prezidentlari mamlakat xavfsizligini ta’minlash maqsadida Kongress roziligisiz qisqa muddatli harbiy amaliyotlarni boshlash huquqiga ega ekanini ta’kidlab kelgan.

“Harbiy vakolatlar to‘g‘risida”gi qonunga ko‘ra, prezident harbiy harakatlarni boshlaganidan so‘ng 48 soat ichida Kongressni xabardor qilishi shart. Bundan tashqari, Kongress ruxsatisiz boshlangan harbiy amaliyotlar 60 kun ichida to‘xtatilishi kerakligi belgilangan.

Eron bo‘yicha ilk 60 kunlik muddat 1-mayda tugagan edi. Biroq respublikachi prezident sulh tufayli harbiy harakatlar yakunlanganini e’lon qilib, bu muddat endi amal qilmasligini ta’kidladi. Holbuki, shundan so'ng ham hujumlar davom etdi va AQSh kuchlari Eron portlarini qamal qildi.

Demokratlar va urushga qarshi bo‘lgan respublikachilar ma’muriyat qonunni noto‘g‘ri talqin qilayotganini ta’kidladi.

Vakillar palatasidagi yuqori martabali demokrat yordamchisi anonimlik sharti bilan Reuters’ga shunday dedi:

“Prezidentning o‘zi to‘rt-olti hafta davom etadi degan urush oylab cho‘zilib ketganini shunchaki yo‘qqa chiqara olmaydi”.

“Ishimni qiyinlashtiryapsiz”

Bundan tashqari, o‘tgan oy Senat va Vakillar palatasi Trampdan AQSH qo‘shinlarini Eronga qarshi harbiy harakatlardan olib chiqishni talab qiluvchi rezolyutsiyani ma’qulladi.

Tramp bunga keskin munosabat bildirib, rezolyutsiyani qo‘llab-quvvatlaganlarni Eronga “madad berayotganlikda” va uning ishini “yanada qiyinlashtirayotganlikda” aybladi.