Халқаро ҳуқуққа ҳам, халқаро тартибга ҳам тупурдик - Владимир Соловьёв нима демоқчи?

Халқаро ҳуқуқни очиқ инкор этиш

Соловьёв ўз чиқишларида халқаро ҳуқуқий меъёрларга риоя қилиш нияти йўқлигини яширмади. Унинг таъкидлашича, миллий хавфсизлик манфаатлари ҳар қандай халқаро қоидалардан устун туради.

«Биз тушунтиришимиз керак: ўйинлар тугади. Халқаро ҳуқуққа ҳам, халқаро тартибга ҳам тупурдик», — деди у.

Шунингдек, у Украинада бошланган ҳарбий ҳаракатлар бошқа минтақаларда ҳам такрорланиши мумкинлигини очиқ тан олди:

«Агар миллий хавфсизлигимиз сабаб Украина ҳудудида махсус ҳарбий операцияни бошлаган бўлсак, айнан шу мулоҳазалардан келиб чиқиб, таъсир доирамизнинг бошқа нуқталарда ҳам нега уни бошламаслигимиз керак?» — деди Соловьёв.

Геосиёсий устуворликлар ва минтақавий таҳдидлар

Кремль пропагандисти Россия учун «яқин хориж» — аввало Арманистон ва Марказий Осиё давлатлари Сурия ёки Венесуэла каби узоқ ҳудудлардан анча муҳим эканини таъкидлади. Унинг фикрича, ушбу минтақаларда таъсирни йўқотиш Россия учун жиддий стратегик оқибатларга олиб келиши мумкин.

«Венесуэладаги воқеалардан кўра Арманистонда юз бераётган жараёнлар биз учун анча оғриқли. Арманистонни йўқотиш — улкан муаммо», — деди у.

Марказий Осиё ҳақида эса қуйидагича баҳо берди:

«Осиёдаги, Ўрта Осиёдаги, улар айтганидек, Марказий Осиёдаги муаммолар биз учун катта фалокатка айланиши мумкин. Шу сабабли мақсад ва вазифаларимизни аниқ белгилаб олишимиз шарт», — дея таъкидлади Соловьёв.

Зўравонликка очиқ даъватлар

Соловьёв Россиянинг Украинадаги ҳаракатлари «етарлича шафқатсиз эмас» деган фикрни илгари суриб, бошқа ҳудудларда янада «қонунсиз ва шафқатсиз» усулларни қўллашни таклиф қилди. У Россия манфаатлари доирасига кирувчи мамлакатларда «ҳар қандай ҳокимият бўлиши мумкин, фақат антироссиячи бўлмаслиги керак», дея Арманистон ва Грузияни мисол сифатида тилга олди.

Шунингдек, у зарурат туғилса, Венесуэла президенти Николас Мадурони ўғрилашга ўхшаш махсус операцияни ҳам амалга ошириш мумкинлигини айтди. Соловьёв бу фикрларида Доналд Трампнинг Гренландия ва Венесуэла ҳақидаги баҳсли риторикасига ҳам ишора қилди.

Владимир Соловьёвнинг баёнотлари Россиянинг ўз «таъсир доираси» деб билган ҳудудларда, жумладан Марказий Осиё ва Арманистонда ҳарбий аралашув эҳтимолини истисно қилмаётганини кўрсатади. Бу эса халқаро ҳуқуқни очиқ рад этиш ва миллий хавфсизликни баҳона қилиб, қўшни давлатлар суверенитетига таҳдид солиш демакдир.