Солиқ қўмитаси иккита банкка огоҳлантириш берди

Қайд этилишича, жорий йилнинг сентябрь ойида айрим тижорат банклари янги ахборот тизимидан фойдаланишга ўтган ва бу ҳақда қўмитага маълум қилинган. Банк дастурчилари янги тизимга ўзгартиришлар киритаётгани сабабли, баъзи тўлов топшириқномалари бажарилмаган.

"Масалан, шу ой бошидан "Тenge bank" 2439 та топшириқномадан 413 тасини ва "Капиталбанк" 4287 та топшириқномадан 740 тасини бажармасдан қайтарган", дейилади муносабатда.

Бундан ташқари, Солиқ қўмитаси ҳузуридаги Йирик солиқ тўловчилар бўйича ҳудудлараро солиқ инспекцияси томонидан мажбуриятларини ўз вақтида бажармаётган ҳар иккала bank камчиликларни зудлик билан бартараф этиш ва бунинг учун Солиқ кодексида белгиланган жавобгарлик чоралари тўғрисида расман огоҳлантирилган. 

Маълумот учун, тўлов топшириқномаси — юридик шахс ва ЯТТ томонидан банк ҳисоб рақамларидан нақд пулсиз ҳисоб-китобларни амалга оширишда фойдаланиладиган ҳужжат бўлиб, унда пулни қаерга, нима учун ва қанча миқдорда ўтказиш тўғрисидаги маълумотлар бўлади.