Soliq qoʻmitasi ikkita bankka ogohlantirish berdi

Qayd etilishicha, joriy yilning sentabr oyida ayrim tijorat banklari yangi axborot tizimidan foydalanishga oʻtgan va bu haqda qoʻmitaga maʼlum qilingan. Bank dasturchilari yangi tizimga oʻzgartirishlar kiritayotgani sababli, baʼzi toʻlov topshiriqnomalari bajarilmagan.

"Masalan, shu oy boshidan "Tenge bank" 2439 ta topshiriqnomadan 413 tasini va "Kapitalbank" 4287 ta topshiriqnomadan 740 tasini bajarmasdan qaytargan", deyiladi munosabatda.

Bundan tashqari, Soliq qoʻmitasi huzuridagi Yirik soliq toʻlovchilar boʻyicha hududlararo soliq inspeksiyasi tomonidan majburiyatlarini oʻz vaqtida bajarmayotgan har ikkala bank kamchiliklarni zudlik bilan bartaraf etish va buning uchun Soliq kodeksida belgilangan javobgarlik choralari toʻgʻrisida rasman ogohlantirilgan. 

Maʼlumot uchun, toʻlov topshiriqnomasi — yuridik shaxs va YaTT tomonidan bank hisob raqamlaridan naqd pulsiz hisob-kitoblarni amalga oshirishda foydalaniladigan hujjat boʻlib, unda pulni qayerga, nima uchun va qancha miqdorda oʻtkazish toʻgʻrisidagi maʼlumotlar boʻladi.