Nogironligi bo‘lgan abituriyentlarga imtihonda qo‘shimcha 50 foiz vaqt beriladi

Hujjatga ko‘ra, 2027/2028-o‘quv yilidan nogironligi bo‘lgan abituriyentlar uchun oliy ta’lim tashkilotlariga kirish imtihonlari, shuningdek, nogironligi bo‘lgan pedagoglarni attestatsiyadan o‘tkazish va milliy sertifikat olish imtihonlarida belgilangan vaqt me’yoriga nisbatan 50 foiz qo‘shimcha vaqt beriladi.

Imtihon jarayonlarida Brayl alifbosi, audio va elektron formatdagi imtihon materiallaridan foydalanish imkoniyati ham ta’minlanadi.

Shuningdek, 2027-yil 1-maydan alohida ta’limga ehtiyoji bo‘lgan bolalarni vaucher asosida ta’lim olishini qo‘llab-quvvatlovchi zamonaviy assistiv, ya’ni yordamchi jihozlar bilan ta’minlash tizimi joriy etiladi.

2026/2027-o‘quv yilidan boshlab ixtisoslashtirilgan davlat ta’lim muassasalarida o‘qitish bolaning individual ta’limga ehtiyoji, funksional imkoniyatlari va o‘zlashtirish darajasiga mos ravishda ishlab chiqiladigan individual ta’lim rejalari asosida tashkil etiladi.

Qarorga muvofiq, 2026-yil 1-sentabrdan korreksion sinf tashkil etgan nodavlat umumiy o‘rta ta’lim muassasalari ham davlat tomonidan moliyaviy qo‘llab-quvvatlanadi. Bunda har bir o‘quvchi uchun Toshkent shahrida BHMning 11 baravari, viloyat markazlari va Nukus shahrida 9,5 baravari, boshqa tuman va shaharlarda esa BHMning 8,5 baravarimiqdorida subsidiya ajratiladi.