Тошкент судларида жорий йилда 7 мингга яқин никоҳдан ажратиш иши кўрилди

Суд маълумотларига кўра, кўрилган ишларнинг қарийб 3 мингтаси бўйича никоҳ расман бекор қилинган, яна 3 минг 784 ҳолатда эса тарафларни яраштириш чоралари кўрилган. Судлар жойларда никоҳ ва оила масалаларига бағишланган учрашувларни мунтазам ўтказиб, оилаларни сақлаб қолишга қаратилган ишларни давом эттирмоқда.

Тошкент шаҳар фуқаролик ишлари бўйича туманлараро судлари жорий йилнинг январ–сентябрь ойларида жами 432 минг 132 та ишни ҳал қилган. Бу республика миқёсидаги барча фуқаролик ишларининг 26,8 фоизини ташкил этган.

Шу давр мобайнида:

• 2 420 та апелляция шикояти,

• 1 мингдан ортиқ кассация шикояти,

• 1 мингдан зиёд тафтиш шикоятлари кўрилган;

уларнинг катта қисми ўзгаришсиз қолдирилган, 278 та иш ўзгартирилган, 745 таси эса бекор қилинган.
Бундан ташқари, қонун бузилиши ҳолатлари бўйича 199 та хусусий ажрим чиқарилиб, ижро учун тегишли идораларга юборилган.

Судларга жорий йилда 6 мингдан зиёд мурожаат келиб тушган бўлиб, уларнинг 11,3 фоизи сайёр қабулларда, қолган қисми эса суд бинолари, почта ва электрон тизимлар орқали қабул қилинган.

Суд тизими инсон ҳуқуқлари ва эркинликларини ҳимоя қилиш, жамиятда адолат ва ҳуқуқий ишонч муҳитини мустаҳкамлаш йўлида фаолиятни изчил давом эттирмоқда.