Toshkent sudlarida joriy yilda 7 mingga yaqin nikohdan ajratish ishi koʻrildi

Sud maʼlumotlariga koʻra, koʻrilgan ishlarning qariyb 3 mingtasi boʻyicha nikoh rasman bekor qilingan, yana 3 ming 784 holatda esa taraflarni yarashtirish choralari koʻrilgan. Sudlar joylarda nikoh va oila masalalariga bagʻishlangan uchrashuvlarni muntazam oʻtkazib, oilalarni saqlab qolishga qaratilgan ishlarni davom ettirmoqda.

Toshkent shahar fuqarolik ishlari boʻyicha tumanlararo sudlari joriy yilning yanvar–sentabr oylarida jami 432 ming 132 ta ishni hal qilgan. Bu respublika miqyosidagi barcha fuqarolik ishlarining 26,8 foizini tashkil etgan.

Shu davr mobaynida:

• 2 420 ta apellyatsiya shikoyati,

• 1 mingdan ortiq kassatsiya shikoyati,

• 1 mingdan ziyod taftish shikoyatlari koʻrilgan;

ularning katta qismi oʻzgarishsiz qoldirilgan, 278 ta ish oʻzgartirilgan, 745 tasi esa bekor qilingan.
Bundan tashqari, qonun buzilishi holatlari boʻyicha 199 ta xususiy ajrim chiqarilib, ijro uchun tegishli idoralarga yuborilgan.

Sudlarga joriy yilda 6 mingdan ziyod murojaat kelib tushgan boʻlib, ularning 11,3 foizi sayyor qabullarda, qolgan qismi esa sud binolari, pochta va elektron tizimlar orqali qabul qilingan.

Sud tizimi inson huquqlari va erkinliklarini himoya qilish, jamiyatda adolat va huquqiy ishonch muhitini mustahkamlash yoʻlida faoliyatni izchil davom ettirmoqda.