Мубашшир Аҳмад суд иши биринчиси ўтди, кейингиси кузга қолдирилди

Олий суд Жамоатчилик билан алоқалар маркази раҳбари Азиз Абидовга кўра, Алишер Турсунов Жиноят Кодексининг учта бобида назарда тутилган жиноятларни содир этганликда айбланмоқда. Суд жараёни очиқ кечган. Суд ОАВ вакилларидан суд жараёни якунлангунига қадар аудио, видео ёзмаслик ва барчадан изоҳ ёки тахминий гумон қилмасликни сўраган.

“Менимча, бу суд қарорини, суд томонидан чиқарилган ажримни муҳокама қилмаймиз. Бу қарорни ижро қилиш керак ва суд жараёни бўлиб ўтмоқда. Суд терговга киришдан олдин прокурор томонидан айблов хулосаси ўқиб эшиттирилди. Ҳозир суд терговини бошлашга ўтилди”, — деди у.

Суд жараённи ёритишга келганда журналистлардан холис ёритишни илтимос қилган.

Турсуновни ҳимоя қилаётган адвокат Абуллоҳ Содиқнинг айтишича, суднинг очиқ бўлиши учун илтимоснома киритилган. Турсуновга нисбатан Жиноят кодексининг 244-³ моддаси ва 244-¹ моддаси учинчи қисми “г” банди ва 156-модда иккинчи қисми билан айблов эълон қилинган.

“Бу айбловларга кўра, 244-³ модда диний материални, яъни Диний қўмита рухсати олинмасдан тарқатилиши. Бу айблов бўйича ҳеч қанақа эътирозимиз йўқ. Сабаби, устоз Туркия Республикасида бўлган ҳолатда ҳам “Азон Глобал”дан ва Ўзбекистонда ҳам “Азон.уз” каналлари орқали бу материалларнинг рухсат олмасдан тарқатилиш ҳолатлари бўлган. Сабаби, ҳеч қандай ғаразли мақсад бўлмаган. Лекин 244-¹ модда, яъни ғаразгўйлик ғоялари билан йўғрилган хатти-ҳаракатларни содир этилиши ва шунга оид бўлган материалларнинг тарқатилиши — бу ерда қасд талаб қилинади. Биз домланинг айнан умуман бунақа қасди бўлмаганлигини, аксинча, аҳолини тинчлантириш ва ғазотга, ўша урушга кетиш ёки жиҳодга мажбурий шу нарсаларга кўчиришни нотўғри тушунган ҳолатда шунақа нарсалар бўлишининг олдини олиш, яъники Ўзбекистонда аҳолининг осойишталигини, тинчлигини, тотувлигини сақлаш мақсадида бу нарсани, фатвони ўзлари уламо ўлароқ илмлардан фойдаланган ҳолда шарҳлаб, уни таржима қилиб, шарҳлаб беришлари мақсади кўзда тутилган”, — деди адвокат.

Унга кўра, Турсуновга қўйилаётган айбловлар яъни 244-¹ моддаси учинчи қисми “б” банди ҳамда 156-модда иккинчи қисми диний адоват қўзғатиш айбловлари ҳам бор.

“Бу ерда ҳам диний адоват йўқ, яъни диний адоват, миллий, ирқий, этник, диний адоват қўзғатиш деган модданинг номланиши, бу модда ҳам, демак, қасдни талаб қилади. Бу ерда ҳам бунақа қасд йўқлиги, яъни диний илмларига ўзаро ишонганлиги, яъни ортиқча ишониб, унинг орқасидан ўйламасдан, унинг оқибатларини ўйламасдан иш тутганликлари ҳақидаги айблов қўйиляпти. Демак, бундай моддаларда айблов тўғри қасддан содир қилинишини инобатга олган ҳолатда ва диний адоват қўзғатиш халқ ўртасида ёки бирор бир халқ, ирқийлар ёки Исроил давлати дегани ҳам, у модданинг диспозициясида давлат кўзда тутилмаяпти. Диний, миллий, ирқий, этник деб кўрсатиляпти. Шу маънода бу айблов билан ҳам келишилмади”, —  деди адвокат.

Тартибга кўра, суд 8 сентябрь кунига суд қолдирилди.

“Бу узоқ муддат, деган эътирозлар келиб чиқяпти, бунинг боиси шундаки, 8 сентябргача бўлган муддат оралиғида, яъни тахминан 20 кун муддат бўлса ҳам, изолятордан одамларни олиб келиш тартиби бор, мустақиллик байрамидан беш кундан кейин тўхтайди ва у кейин байрамдан кейин ҳам беш кундан кейин яна тўхтайди. Яъни шу нуқтаи назардан бу чўзилган деб ҳисоблаймиз ва бу нормал ҳолат. Сабаби, бу битта иш доирасидагина нарса эмас, бу бутун тизимда шунақа тартиб ўрнатилган ва буни тўғриқабул қилиниши ҳам менимча мақсадга мувофиқ бўлади”, – деди у.