Тошкент вилоятида йўл ҳаракати қоидасини бузган 10 нафар шахс қамалди

Қайд этилишича, юқоридаги ҳолат Бўстонлиқ туманида кузатилган. 10 нафар ёш 6 та автомобилда гуруҳ-гуруҳ бўлиб ҳаракатланиб, ушбу йўлдан кетаётган бошқа ҳайдовчиларнинг ҳаракатланишига халақит берган. Бундан ташқари, видеотасвирда машина ичида бўлган шахсларнинг автомобиль ойнасидан танасини чиқариб кетаётганини ҳам кўриш мумкин. 

Ушбу ҳолат тармоқларда тарқалганидан сўнг Бўстонлиқ тумани йўл-ҳаракати хавфсизлиги ходимлари томонидан ўрганилган. Суриштирув давомида қоидабузарларнинг 5 та транспорт воситаси Тошкент вилоятида, 1 та транспорт воситаси эса Қашқадарё вилояти ҳудудида экани аниқланиб, мазкур автомобиль ҳайдовчиларининг барчасига маъмурий баённомалар расмийлаштирилган.

"Қолган ҳаракат иштирокчиларига қўшилиб мен ҳам "аваренка"ни ёқиб, секин гуруҳ бўлиб ҳаракатланганман. Қилган айбимни тан оламан, бундай ҳолатлар бошқа қайтарилмайди. Ушбу бепарволигим оқибатида бошқа иштирокчиларга халақит берган бўлсам, улардан узр сўрайман", дейди қоидабузарлардан бири.

Шунингдек, йўл ҳаракати қоидаларига амал қилмаган бошқа бир ўсмир эса туғилган куни бўлгани сабабли, шўхлик ортидан ушбу ҳолат юзага келганини билдирган.

"Туғилган куним эди. Шу муносабат билан ўртоқларим ва қариндошларим билан Тошкент вилояти Бўстонлиқ туманида туғилган кунимни нишонладик ҳамда озгина шўхлик қилиб қўйдик. Катта трассаларда, кўчаларда нотўғри ҳаракатларни юзага келтирдик. Бир оғайнимиз видеога олганди. Ижтимоий тармоқлардаги саҳифасига жойлабди. Биз бу видео бундай тарқалиб кетишини кутмаган эдик. Қилган ишимиздан афсусдамиз. Шахсан мен пушаймонман. Тенгқурларимдан бундай қоида бузарликларни қилмасликларини сўраб қоламан. Қилган ишимдан роса пушаймонман", дейди боша бир қоидабузар.

Шундан сўнг ушбу фуқароларнинг фикрлари билан Бўстонлиқ тумани ички ишлар бошқармаси ходимлари мазкур видеони тасвирга олган яна бир қоидабузарларни ҳам аниқланиб, уларнинг ҳаракатларига ҳуқуқий баҳо берган.

"Олиб борилган суриштирувлар давомида қоидабузарларнинг шахсларига ойдинлик киритилиб, ҳолат юзасидан бир нечта ҳужжатлар тўпланган. Ушбу ҳужжатлар кўриб чиқилиши учун Жиноят ишлари бўйича Бўстонлиқ тумани судига жўнатилган. Аммо номаълум сабабларга кўра, суд мажлисида тасвирга олишга рухсат берилмади", дейилади манбада.

Сўнг 10 нафар қоидабузарнинг иши судда кўриб чиқилган. Суд қарорида уларнинг 9 нафарига 10 сутка маъмурий қамоқ жазоси белгиланган. Бир нафарига эса фарзанди борлиги учун жарима жазоси қўлланган. Бундан ташқари, барча қоидабузарларни йиғиб, профилактик суҳбатлар ҳам олиб борилган. Суҳбат давомида улар бундай хатти-ҳаракатларни бошқа амалга оширмасликка чақирилган.