Тошкентда “ақлли” светофорлар тизими кенгайтирилади

Шаҳар чорраҳалари ягона сунъий интеллектли тизимга уланиб, транспорт оқимини самарали тартибга солиш ва тирбандликларни камайтириш имкони пайдо бўлади.

Ўзбекистон

13.03.2026, 10:23

Lotinchada

Улашиш:

Тошкент шаҳар ҳокимлиги маълумотига кўра, пойтахтда йўл ҳаракатини бошқариш тизими модернизация қилинмоқда. Ҳозирги вақтда 125 та чорраҳа тизимга уланган, 2026 йилга қадар яна 545 та объект уланиши режалаштирилган.

Сингапур, Копенгаген ва Нью-Йорк каби шаҳарларда жорий этилган сунъий интеллектли светофорлар камера ва сенсорлар орқали транспорт ва пиёдалар ҳаракатини реал вақтда таҳлил қилади. Машиналар оқими ва тирбандлик даражасига қараб сигналлар вақти автоматик ўзгаради, бу сафар вақтини ўртача 20% қисқартиради.

Тез ёрдам ва фавқулодда ҳолатларда тизим автоматик устуворлик беради: “яшил йўлак” яратиб, махсус транспорт тўхтамасдан ҳаракат қилади, бу эса инсон ҳаётини сақлашда ҳал қилувчи аҳамиятга эга.

Ҳисоб-китоблар асосида тизим йўл полосалари бўйича транспорт оқимини таҳлил қилади. Тошкентда 5 дақиқа ичида асосий ҳаракат полосасидан 300 та, бурилиш полосасидан 120 та автомобиль ўтса, сунъий интеллект бу маълумотга қараб сигнал вақтларини тақсимлайди.

Ўзбекистон инфратузилмасида тизим жорий этиш осон: видеокамералар, сенсорлар ва оптик интернет тармоқлари мавжуд. Бу ечим иқтисодий ва самарали бўлиб, йўл инфратузилмасини тўлиқ қайта қуриш талаб этилмайди.

Шунга кўра, Тошкентда 2026 йил якунига қадар 545 та замонавий “ақлли” светофор ўрнатилиши режалаштирилган, бу эса йўл ҳаракати тартибини яхшилаш ва тирбандликларни камайтиришда катта аҳамиятга эга.

Муаллиф: Гули Аҳмадова

Ўзбекистон

13.03.2026, 10:23

Улашиш:

#ақлли светофор

машҳур янгиликлар