Тошкентда аёл собиқ турмуш ўртоғининг зўравонлигидан ҳимоя сўрамоқда

 Маълумотларга кўра, аёл уч йил давомида эркак билан бирга яшаган. Улар ажрашгандан сўнг ҳам эркак маст ҳолда унинг ёнига келиш, ҳақорат қилиш ва ҳаётини назорат қилишга уринишни бошлаган. Бу ҳақда Nemolchi.uz хабар берди.

Жабрланувчи аввалроқ ҳимоя ордери олган, аммо унинг муддати 20 сентябрда тугаган. У 18 сентябрь куни ордерни узайтириш бўйича участка нозирига мурожаат қилган, лекин иш судга юборилмаган. Бунинг сабаби аёлга изоҳланмаган.

16 октябрь куни эркак уни иш жойи ёнидаги автотураргоҳда ушлаб, ҳақорат қилган ва урмоқчи бўлган. Ҳамкасблари аралашганидан сўнг ҳодиса олди олинган. Аёл полицияга мурожаат қилиб, ариза ёзган.

Бироқ 25 октябрь куни яна бир ҳодиса содир бўлган — бу сафар у болалари билан яшайдиган уйи олдида. Жабрланувчининг айтишича, эркак яна таҳдид қилган, сўккан ва уни сочидан тортиб, пул талаб қилган. У яна ҳуқуқ органларига мурожаат қилган, аммо ҳимоя ордери ҳануз берилмаган.

Аёлнинг сўзларига кўра, собиқ турмуш ўртоғи уни доим қўрқитиб, «алоқалари борлиги» ва «машинасига бирор нарса солиб қўйиш» орқали уни қаматиши мумкинлигини айтган.

«Мен энди ўз машинамда юрмайман — у эшитув қурилмаси ўрнатган бўлиши мумкинлигидан қўрқаман», — деган жабрланувчи.

Ҳозирча ҳуқуқ-тартибот органлари иш юзасидан қандай чоралар кўрилгани ҳақида маълумот бермаган. Шунингдек, тажовузкор билан профилактик суҳбат ўтказилган-ўтказилмагани ҳам маълум эмас.