Фуқаролар мурожаатларини қабул қилишда янги тартиб жорий этилди

 Бу ҳақда 27 январь куни Президент Шавкат Мирзиёев иштирокида ўтказилган йиғилишда маълум қилинди.

Йиғилишда Чилонзор тумани мисолида ички ишлар органлари фаолиятида янги ёндашувлар тақдим этилди. Унга кўра, эндиликда туман ички ишлар ходимлари ўз хизмат йўналиши ва ҳудудидан қатъи назар, фуқаролар мурожаатларини қабул қилади. Кўчада формали ички ишлар ходимига қилинган мурожаат 102 хизматига берилган хабар билан тенглаштирилади.

Шунингдек, Тошкент шаҳридаги 55 та маҳаллада профилактика инспекторларининг хизмат хоналари улар билан тезкор алоқа ўрнатиш имконини берувчи махсус тугмалар билан жиҳозланади. Профилактика инспекторлари қаерда бўлишидан қатъи назар, аҳоли улар билан қўл телефонлари ва планшетлари орқали тун-у кун боғланиши мумкин бўлади.

Профилактика инспекторлари учун замонавий ва халққа мос хизмат формаси жорий этилади. Уларнинг иш фаолияти рақамлаштирилиб, «овозли тушунтириш хати» олиш амалиёти йўлга қўйилади.

Бундан ташқари, туман ички ишлар тергов бўлимларида материалларни кўриб чиқувчи терговга қадар текширув гуруҳлари ташкил этилади. Энди профилактика инспекторларининг фаолиятини баҳолашда протокол тузиш асосий мезон бўлмайди.

Йиғилишда аҳоли ҳуқуқларини ҳимоя қилиш ва қулайлик яратиш мақсадида судлар, адвокатура ҳамда суд-тиббий экспертиза хизматлари учун марказлашган тунги навбатчилик тизимини жорий этиш бўйича хорижий тажрибани ўрганиш вазифаси белгиланди.

Қайд этилишича, эндиликда ички ишлар органлари ва Миллий гвардия ходимларига тунги хизматнинг ҳар бир соати учун базавий ҳисоблаш миқдорининг 5 фоизи миқдорида қўшимча ҳақ тўланади. Шу билан бирга, аҳоли гавжум жойларда дронлар ёрдамида патруллик кузатуви амалга оширилади.

Шунингдек, ҳуқуқбузарликлар профилактикасига оид қонунчиликни амалда ишлайдиган ҳолатга келтириш ва Маъмурий жавобгарлик тўғрисидаги кодексни такомиллаштириш режалаштирилган.

Тошкент шаҳрида хавфсиз муҳитни шакллантириш мақсадида «пойтахт намунаси» жорий этилади.