Тошкент шаҳар ИИББ бошлиғи ва прокурорига «ҳайфсан» берилди: пойтахтда 800 дан ортиқ жиноят ҳисобдан яширилган

Президент Шавкат Мирзиёев бошчилигида ўтказилган видеоселектор йиғилишида давлат раҳбари пойтахт ҳуқуқ-тартибот тизимида жиддий камчиликлар мавжудлигини кескин танқид қилди. Хусусан, терговчи ва суриштирувчилар малакасининг етишмаслиги оқибатида ўтган йили 833 та ҳолат бўйича жиноят иши қўзғатилмай, ҳисобдан яширилгани қайд этилди.

Расмий ҳисоботларда жиноятчилик камайгани кўрсатилганига қарамай, шаҳарда 26 та маҳалла «қизил», 465 таси эса «сариқ» тоифада қолмоқда. Мазкур ҳолатлар асосида Равшан Султонхўжаев ва Анвар Ўрмоновга олти ойлик синов муддати тайинланди. Агар ушбу даврда вазият ижобий томонга ўзгармаса, лавозимга лойиқлик масаласи қайта кўриб чиқилиши маълум қилинди.

Йиғилишда Тошкентнинг айрим туманларида республика миқёсида энг юқори жиноятчилик кўрсаткичлари қайд этилгани таъкидланди. Хусусан:

• Чилонзор тумани — оилавий зўравонлик, талончилик ва безорилик бўйича республикада етакчи;
• Юнусобод тумани — босқинчилик ҳолатлари бўйича энг юқори кўрсаткичга эга;
• Яшнобод ва Миробод туманларида қотиллик жиноятлари кўп қайд этилган;
• Олмазор тумани — қасддан тан жароҳати етказиш ҳолатлари бўйича етакчи;
• Шайхонтоҳур тумани — талончилик жиноятлари энг кўп қайд этилган ҳудуд сифатида тилга олинди.

Юқорида санаб ўтилган беш туман ИИБ бошлиқлари тўлиқ янгиланди. Янги раҳбарлар олдига жиноятчиликни кескин камайтириш ва тизимли чора-тадбирларни амалга ошириш талаби қўйилди.

Шунингдек, шаҳар раҳбарларининг фақат «микроавтобусда айланиш» билан чекланиб қолгани, туман ҳокимлари ва «маҳалла еттилиги» билан ҳамжиҳатликда ишламаётгани танқид остига олинди. Таъкидланишича, жамоатчилик билан яқин ҳамкорлик йўлга қўйилса, пойтахтда йилига 7,5 мингта жиноятнинг олдини олиш имкони мавжуд.