Тошкентда ҳаво ифлосланишига қарши чоралар кучайтирилди: йўллар намланмоқда, фавворалар ишга туширилди

Бу ҳақда шаҳар ҳокимлиги маълум қилди.

Муттахассислар таъкидлашича, йўл ва унга яқин майдонларни намлаш PM2.5 ва PM10 заррачаларини ерга чўктириб, ҳавога қайта кўтарилишининг олдини олади. Автомобиллар ҳаракати сабаб юзага келадиган «иккинчи даражали чангланиш» ҳам сезиларли камаяди.

Ҳокимлик ахборотига кўра, чангланиш кучайган кунларда:

• йўлларга сув сепиш;
• яшил майдонларни кўпроқ суғориш;
• фавворалар ва микроклимат ускуналарини вақтинча ишга тушириш чоралари кўрилмоқда.

Муттахассислар бу усул ҳаво сифатини бир неча соат ичида яхшилаши мумкинлигини, аммо у фақат комплекс чоралар тизимининг бир қисми эканини таъкидлайди.

Шунингдек, ҳавони ифлослантирувчи манбаларни камайтириш мақсадида:

• иссиқхоналар фаолиятида рейдлар ўтказиш,
• қозонхоналарга фильтрлар ўрнатиш,
• экологик назоратни кучайтириш ишлари давом этмоқда.

Тошкент ҳокимлиги ҳаво ифлосланишига қарши кураш доимий равишда олиб борилаётганини маълум қилди.