Toshkentda havo ifloslanishiga qarshi choralar kuchaytirildi: yoʻllar namlanmoqda, favvoralar ishga tushirildi

Bu haqda shahar hokimligi maʼlum qildi.

Muttaxassislar taʼkidlashicha, yoʻl va unga yaqin maydonlarni namlash PM2.5 va PM10 zarrachalarini yerga choʻktirib, havoga qayta koʻtarilishining oldini oladi. Avtomobillar harakati sabab yuzaga keladigan «ikkinchi darajali changlanish» ham sezilarli kamayadi.

Hokimlik axborotiga koʻra, changlanish kuchaygan kunlarda:

• yoʻllarga suv sepish;
• yashil maydonlarni koʻproq sugʻorish;
• favvoralar va mikroklimat uskunalarini vaqtincha ishga tushirish choralari koʻrilmoqda.

Muttaxassislar bu usul havo sifatini bir necha soat ichida yaxshilashi mumkinligini, ammo u faqat kompleks choralar tizimining bir qismi ekanini taʼkidlaydi.

Shuningdek, havoni ifloslantiruvchi manbalarni kamaytirish maqsadida:

• issiqxonalar faoliyatida reydlar oʻtkazish,
• qozonxonalarga filtrlar oʻrnatish,
• ekologik nazoratni kuchaytirish ishlari davom etmoqda.

Toshkent hokimligi havo ifloslanishiga qarshi kurash doimiy ravishda olib borilayotganini maʼlum qildi.