Тошкентда МИБ ходимларига жиноят иши қўзғатилди

Тошкент шаҳрида Мажбурий ижро бюросининг мансабдор шахслари ижро ҳужжатларини асоссиз тамомлаши ортидан 202,9 млрд сўмлик жами 200 та ижро ишида қонунбузилиши ҳолатларига йўл қўйгани аниқланди. Бу ҳақда Коррупцияга қарши курашиш агентлиги ахборот хизмати маълум қилди.

Ўзбекистон

08.11.2024, 10:26

Lotinchada

Улашиш:

Toshkentda MIB xodimlariga jinoyat ishi qoʻzgʻatildi

Қайд этилишича, агентлик Шайхонтоҳур туман Мажбурий ижро бюросини текширган. Ўрганишлар давомида мазкур бюрода ишлайдиган мансабдор шахслар иш юритувидаги ижро ҳужжатларини асоссиз тамомлаш оқибатида ижро ишларида қонунбузилиши ҳолатларига йўл қўйилгани маълум бўлган.

Жумладан, бюронинг туман бўлими иш юритувчиси "С.Б." МЧЖдан давлат фойдасига 19 млрд сўмлик, "П.П." МЧЖдан 179,2 млн сўм солиқ қарздорлигини ундириш тўғрисидаги ижро ишлари қонунчилик талабларига зид равишда асоссиз тугатилган. Бунинг оқибатида ушбу солиқчининг қарздорлиги бугунги кунга қадар ундирилмаган.

Шунингдек, "С.C.Г." МЧЖ дан 26,3 млрд сўм, "Р.Ф.П." МЧЖдан 19,4 млрд сўм ва "Я.М.С.Э.Т" МЧЖдан 1,7 млрд сўм давлат фойдасига солиқ қарздорликларини ундириш тўғрисидаги ижро ишлари мазкур корхоналар фаолият юритиб келаётган манзили аниқ бўла туриб, асоссиз тамомланган.

Шу каби "П.Э.Э.С." МЧЖдан ундирувчи "Б.П.Т." МЧЖнинг фойдасига жами 1,9 млрд сўм, "М.С." МЧЖдан ундирувчи "С." АЖнинг фойдасига 1,1 млрд сўм қарздорликларни, қарздор Б.П.дан ундирувчи Н.Г.нинг фойдасига 332 млн сўм жиноят ортидан етказилган зарарни, қарздор "М.Т." МЧЖдан давлат фойдасига 6,3 млрд сўм ва 331 млн сўм солиқ қарздорлигини ундириш тўғрисидаги ижро ишлари қарздорнинг номига расмийлаштирилган мол-мулклар мавжуд бўла туриб, асоссиз якунланган.

Мазкур ҳолатлар юзасидан ўрганиш мобайнида тўпланган ҳужжатлар асосида Тошкент шаҳар прокуратураси томонидан Жиноят кодексининг тегишли моддалари билан жиноят иши қўзғатилди. Ҳозирда уларга нисбатан тергов ҳаракатлари олиб борилмоқда.