Жанубий Корея компанияси Тошкентдаги янги аэропорт қурилишида қатнашади

Нашрда таъкидланишича, Янги Тошкент халқаро аэропорти лойиҳаси Саудия Арабистонининг Vision Invest инфратузилма инвестиция компанияси иштирокида давлат-хусусий шериклик асосида амалга оширилаётган йирик инфратузилма ташаббусидир. Лойиҳа Ўзбекистон ҳукуматининг авиация инфратузилмасини модернизация қилиш режасининг муҳим қисми бўлиб, Марказий Осиё учун замонавий ҳаво логистика маркази сифатида хизмат қилиши кутилмоқда.

Келишувга кўра, IIAC кейинги беш йил давомида хавфсизлик, ахборот технологиялари инфратузилмаси, йўловчи тажрибаси ва хизмат кўрсатиш сифати каби йўналишларда ўз тажрибасини Ўзбекистонда қўллаган ҳолда кенг қамровли консалтинг хизматлари тақдим этади.

IIAC бош директори Ли Хак-Же бу ҳақда шундай деди:

“Ўзбекистон Марказий Осиёда транспорт марказига айланиш учун катта салоҳиятга эга. Биз минтақада иккинчи ва учинчи ‘Инчхон’ аэропортларини яратишни мақсад қилганмиз — бу хориждаги фаолиятимизни кенгайтириш учун муҳим қадам бўлади”.

Шунингдек, IIACнинг фаолияти фақат Тошкент билан чекланиб қолмаяпти. Шу куни компания “Uzbekistan Airports” акциядорлик жамияти билан ҳам “Урганч” аэропортини ривожлантириш бўйича давлат-хусусий шериклик шартномасини имзолади. Ҳамкорлик доирасида асосий объектларни босқичма-босқич қуриш, терминаллар фаолиятини оптималлаштириш, авиакомпанияларни жалб этиш ва тижорат даромадларини ошириш режалаштирилган.