Тошкентдан Сирдарёга кўчаётган бизнесменларга янги имтиёзлар берилади

Тошкент шаҳридаги саноат корхоналарини босқичма-босқич бошқа ҳудудларга кўчириш жараёни давом этмоқда. Сирдарёга кўчишни режалаштираётган тадбиркорларга эркин иқтисодий зонадан соддалаштирилган тартибда ва чегирма асосида ер ажратилади. Шунингдек, 10 миллиард сўмгача имтиёзли кредит берилиши ҳамда хомашёларни темир йўл орқали ташишда арзонлаштирилган тарифлар қўлланиши белгиланди.

Ўзбекистон

05.12.2025, 10:31

Lotinchada

Улашиш:

Президент Шавкат Мирзиёев иштирокида ўтган Халқ депутатлари Сирдарё вилояти кенгашининг навбатдан ташқари сессиясида мазкур йўналиш бўйича муҳим янгиликлар маълум қилинди.

Қарорга кўра, корхонасини Сирдарё вилоятига кўчирмоқчи бўлган тадбиркорларга бир қатор имтиёзлар тақдим этилади. Хусусан:

Сирдарё эркин иқтисодий зонасидан соддалаштирилган тартибда ва чегирма асосида ер ажратилади;
10 миллиард сўмгача имтиёзли кредит берилади;
Хомашёларни темир йўл транспорти орқали ташишда арзонлаштирилган тарифлар қўлланади.

Вилоятда фаолият юритаётган 1 140 та саноат корхонасидан 129 таси паст қувватда ишлаётгани қайд этилди. Сабаб сифатида эҳтиёт қисм ва бутловчиларни четдан олиб келиш туфайли таннарх ошиб кетаётгани айтилди. Ушбу маҳсулотларни ҳудуднинг ўзда ишлаб чиқариш орқали таннархни 10 фоизгача камайтириш мумкинлиги таъкидланди.

Шунингдек, “Фаровон” кичик саноат зонасига туташ 200 гектар майдонда бутловчи қисмлар ишлаб чиқариш кластери ташкил этиш ташаббуси қўллаб-қувватланди. Ҳудудда инфратузилма мавжуд бўлгани сабабли қўшимча харажатлар талаб этилмайди. Вилоят ҳокимлигига бу ерда 800 миллион долларлик маҳаллийлаштириш лойиҳаларини йўлга қўйиш топширилди.

Ўзбекистон

05.12.2025, 10:31

Улашиш:

#Сирдарё #имтиёз #бизнесмен

мавзуга оид янгиликлар