"Ҳудудга қаровчи шахс" 10 суткага қамалди

Тошкент туманида жойлашган «Қоплонбек» божхона постида содир бўлган жанжал юзасидан бир фуқарога нисбатан маъмурий қамоқ жазоси тайинланди.

Ижтимоий тармоқларда тарқалган видеолар асосида олиб борилган суриштирувлар натижасида маълум бўлишича, воқеа 2026 йил 25 апрель куни тахминан соат 01:00 ларда содир бўлган. 1989 йилда туғилган фуқаро И.Х. бозор сумкаларини олиб кириш учун юк ташувчи бўлиб ишловчи 1993 йилда туғилган Ж.С. билан 500 минг сўмга келишган.

Юклар олиб ўтилгандан сўнг Ж.С. қўшимча равишда яна 100 минг сўм талаб қилган ва шу орқали томонлар ўртасида тортишув келиб чиққан. Жанжал жараёнида у ўзини “ҳудудга қаровчи шахс” сифатида таништириб, И.Х.ни ҳақорат қилган.

Ҳолат юзасидан Ж.С.га нисбатан Маъмурий жавобгарлик тўғрисидаги кодекснинг 183-моддаси асосида иш қўзғатилди. Суд қарорига кўра, у 10 сутка маъмурий қамоқ жазосига ҳукм қилинган.