7 августдан ҳайвонларни рўйхатдан ўтказиш мажбурий бўлади

Янги қоидаларга мувофиқ, уй ва қишлоқ хўжалиги ҳайвонлари ветеринария паспортига эга бўлиши ҳамда давлат реестрига киритилиши шарт бўлади.

Тартибга кўра, ҳайвон эгалари уларни белгиланган муддатларда рўйхатдан ўтказиши лозим:

• сигир, қўй, эчки ва туялар — туғилганидан кейин 14 кун ичида;
• отлар — 4 ойликкача;
• чўчқалар — 30 кун ичида;
• итлар ва мушуклар — 3 ойликкача.

Шунингдек, янги қоидаларга кўра, ҳайвоннинг ҳолатида юз берган муҳим ўзгаришлар ҳақида ҳам давлат реестрига ўз вақтида маълумот киритилиши талаб этилади.

Хусусан, агар ҳайвон ўлса, ўлдирилса ёки чет элга олиб чиқилса, эгаси бу ҳақда 7 кундан кечиктирмай уни давлат реестридан чиқариш учун мурожаат қилиши шарт.

Бундан ташқари, рўйхатдан ўтмаган ҳайвонларни сақлаш ва кўпайтиришга ҳам йўл қўйилмайди.

Манбада қайд этилишича, келгусида ҳайвонларни белгиланган тартибда рўйхатдан ўтказмаганлик учун маъмурий жавобгарлик чоралари ҳам қўлланилиши мумкин. Шу боис ҳайвон эгаларига ҳужжатларни ўз вақтида расмийлаштириш тавсия этилмоқда.