Газ етиб бормаган маҳаллалар электр иситиш тизимига ўтказилади

Президент Шавкат Мирзиёев раислигида ўтган видеоселектор йиғилишида айтилишича, бугунги кунда мамлакатда 1 916 та маҳаллага табиий газ етказиш муаммоли бўлиб қолмоқда. Шу боис мутасаддиларга уч ой ичида ушбу маҳаллаларни электр орқали иситишга ўтказиш учун қанча инфратузилма, қанча қўшимча электр қуввати ва маблағ талаб этилишини аниқ ҳисоблаб чиқиш вазифаси юклатилди.

Ҳисоб-китоблар якунлангач, энг зарур маҳаллалар учун алоҳида давлат дастури ишлаб чиқилади.

Йиғилишда энергетика соҳасини рақамлаштириш ҳам асосий мавзулардан бири бўлди. Таъкидланишича, бугун тармоқда ўн минглаб ходим фаолият юритса-да, уларнинг иши тўлиқ рақамли бошқарилмагани сабабли меҳнат унумдорлиги ривожланган давлатларга нисбатан анча паст.

Шу муносабат билан Энергетика вазирлиги ҳузурида Ёқилғи-энергетика тармоғини рақамлаштириш ва сунъий интеллектни жорий этиш маркази ташкил этилади. Марказ электр ва газ таъминотидан тортиб, кўмир, суюлтирилган газ ҳамда мазут тақсимотигача бўлган бутун тизимни таҳлил қилиб, самарадорликни оширишга қаратилган янги ечимларни ишлаб чиқади.

Бундан ташқари, мамлакатда 3,7 миллион хонадон суюлтирилган газдан фойдаланаётгани қайд этилди. Газни ўз вақтида етказиб беришдаги муаммоларни бартараф этиш учун эса хусусий секторни жалб қилиш таклифи маъқулланди. Янги тизим дастлаб Андижон вилоятида синов тариқасида йўлга қўйилади.