Андижондан мурожаат: ошхона мижозлари сабаб йўл ҳаракати қийинлашмоқда

Фуқаронинг йўллаган мурожаатида Андижон шаҳридаги Бўстон МФЙ, У. Юсупов кўчасида жойлашган икки ошхона атрофида айрим ҳайдовчилар автомобилларини қатнов қисмига қўйиб, транспорт ҳаракатига тўсқинлик қилаётгани айтилган.

Мурожаат муаллифининг таъкидлашича, кўчада ҳар бир йўналиш учун биттадан қатнов бўлаги мавжуд. Автомобилларнинг йўл четида эмас, қатнов қисмида қолдирилиши сабаб 11-сонли автобуслар ва бетон ташиётган йирик техникалар қарама-қарши йўналишга чиқишга мажбур бўлмоқда. Бу эса йўл ҳаракати хавфсизлиги билан боғлиқ хавотирларни юзага келтирган.

Видеокузатув камераси нега ишламаяпти?

Фуқаро «Копейка» дўкони олдига ўрнатилган 360 даражали видеокузатув камераси бир неча ойдан бери ишламаётганини билдирган. Унинг сўзларига кўра, Ички ишлар вазирлигига мурожаат қилингач, камера бир-икки кунга ишга тушади, кейин яна ишламай қолади.

Мурожаатда камеранинг нега мунтазам ишламаётгани, унинг фаолияти учун ким масъул экани ва аввалги шикоятлар юзасидан қандай чоралар кўрилгани текширилиши сўралган. Камера атайлаб ўчирилаётгани ҳақидаги эҳтимолий шубҳалар ҳам текширилиши кераклиги қайд этилган. Бу ҳолатлар ҳозирча мустақил равишда тасдиқланмаган.

112 рақамига беш марта қўнғироқ қилинган

Мурожаат муаллифи 2026 йил 22 октябрь куни соат 20:09, 20:32, 20:57, 21:15 ва 21:26 да 112 рақамига қўнғироқ қилганини, бироқ тегишли ходимлар у билан қайта боғланмаганини билдирган.

Шунингдек, муаммо юзага келаётган ҳудуд Андижон шаҳар Йўл ҳаракати хавфсизлиги бўлими биносига туташ экани таъкидланган. Муаллиф масъул ходимларнинг вазиятдан хабардорлиги ва тегишли чоралар кўрилган-кўрилмаганини текширишни сўраган.

Фуқаро мурожаатида ҳудудга бевосита чиқиб вазиятни ўрганиш, йўл ҳаракатига тўсқинлик қилаётган автомобиллар юзасидан қонуний чоралар кўриш, видеокузатув камерасининг ишлашини тиклаш ва 112 рақамига қилинган қўнғироқларни қайдлар ҳамда ауди ёзувлар асосида текшириш талабларини илгари сурган.

Мазкур мурожаат бўйича ваколатли идораларнинг расмий изоҳи ва текширув натижаларини кутиб қоламиз.