Бино ва иншоотлар қурилишида хусусий назорат тартиби белгиланди

Ҳукуматнинг 2026 йил 13 апрелдаги 167-сон қарори билан “Якка тартибдаги уй-жойлар ҳамда кичик ҳажмдаги нотурар бино ва иншоотларни қуриш ва реконструкция қилиш ишлари юзасидан хусусий қурилиш назоратини амалга ошириш тартиби тўғрисида”ги низом тасдиқланди.

Унга кўра, хусусий қурилиш назорати қурувчи ва назоратчи ўртасида тузиладиган шартнома асосида амалга оширилади. Шунингдек, мазкур назорат буюртмачи (мулкдор) ихтиёри билан жорий этилади.

Низомда қурилишнинг асосий босқичлари ҳам аниқ белгилаб берилган. Жумладан:

• пойдевор қуриш,
• асосий кўтарувчи конструкцияларни барпо этиш,
• девор ва тўсувчи қисмларни қуриш,
• том ёпиш ишлари ва бошқалар.

Шунингдек, буюртмачи ҳар бир босқич якунланишидан камида 2 кун олдин хусусий назоратчини электрон ёки ёзма равишда хабардор қилиши лозим.

Назоратчи эса хабарномани олгандан сўнг 1 иш куни ичида объектга сертификатланган мутахассисни бириктиради. Текширув натижалари бўйича 5 иш куни давомида ижобий хулоса берилади ёки зарур ҳолларда қўшимча кўрик ўтказилиб, хулоса рад этилиши мумкин.