БМТ махсус маърузачиси: Ғазода журналистлар ўлдирилиши — геноцидни яширишга уриниш

У БМТ Инсон ҳуқуқлари бўйича кенгашининг 60-сессияси доирасида ўтказилган матбуот анжуманида Ғазо ва оккупация қилинган Фаластин ҳудудларидаги вазият юзасидан ҳисобот тақдим этди.

«Бу одамлар атайлаб танлаб ўлдирилган, чунки ўз касбий фаолиятлари орқали қирғин ва геноцид ҳақиқатини очиққа чиқараётган эди. Бу фақат журналистларни йўқотиш эмас, балки тарихнинг ўзига ҳам зарба беришдир. Ҳозирги кунда Ғазодаги маҳаллий журналистлар асосий юкни кўтармоқда, чунки у ерда улардан бошқа ҳеч ким қолмади», — деди Хон.

Маълумотларга кўра, 2023 йил 7 октябрдан буён Исроил томонидан 252 журналист қасддан ўлдирилган.

Хоннинг таъкидлашича, яқин тарихда бирорта ҳам БМТ аъзоси бўлган давлат деярли уч йил давом этган қуролли можаро ва геноцид шароитида халқаро мустақил ОАВга киришни бунчалик даражада чекламаган.

Унинг сўзларига кўра, журналистлар халқаро гуманитар ҳуқуққа кўра фуқаро ҳисобланади ва уларни бошқа тинч аҳоли каби ҳимоя қилиш зарур.

«Журналистика — жиноят эмас. Журналистларни ўлдириш — геноцидни яширишга уриниш. Агар маҳаллий журналистлар ва ташқи ахборот оқимини тўхтатишга муваффақ бўлишса, Исроил армияси ўз ҳаракатларини ҳеч қандай жавобгарликсиз давом эттириши мумкин деб ҳисоблаяпти», — дея қўшимча қилди Хон.

У шунингдек, Исроил оккупация қилинган ҳудудларда журналистлар ўлдирилиши юзасидан бирорта ҳам мустақил терговга йўл қўймаганини таъкидлади.

Махсус маърузачи Россия ва Украина ўртасидаги можарода 2022 йил февралдан бери 14 журналист ҳалок бўлганини эсга солиб, Ғазодаги вазиятнинг кўлами ва йўқотишлари билан бутунлай бошқача даражада эканини қайд этди.