BMT maxsus maʼruzachisi: Gʻazoda jurnalistlar oʻldirilishi — genotsidni yashirishga urinish

U BMT Inson huquqlari boʻyicha kengashining 60-sessiyasi doirasida oʻtkazilgan matbuot anjumanida Gʻazo va okkupatsiya qilingan Falastin hududlaridagi vaziyat yuzasidan hisobot taqdim etdi.

«Bu odamlar ataylab tanlab oʻldirilgan, chunki oʻz kasbiy faoliyatlari orqali qirgʻin va genotsid haqiqatini ochiqqa chiqarayotgan edi. Bu faqat jurnalistlarni yoʻqotish emas, balki tarixning oʻziga ham zarba berishdir. Hozirgi kunda Gʻazodagi mahalliy jurnalistlar asosiy yukni koʻtarmoqda, chunki u yerda ulardan boshqa hech kim qolmadi», — dedi Xon.

Maʼlumotlarga koʻra, 2023 yil 7 oktabrdan buyon Isroil tomonidan 252 jurnalist qasddan oʻldirilgan.

Xonning taʼkidlashicha, yaqin tarixda birorta ham BMT aʼzosi boʻlgan davlat deyarli uch yil davom etgan qurolli mojaro va genotsid sharoitida xalqaro mustaqil OAVga kirishni bunchalik darajada cheklamagan.

Uning soʻzlariga koʻra, jurnalistlar xalqaro gumanitar huquqqa koʻra fuqaro hisoblanadi va ularni boshqa tinch aholi kabi himoya qilish zarur.

«Jurnalistika — jinoyat emas. Jurnalistlarni oʻldirish — genotsidni yashirishga urinish. Agar mahalliy jurnalistlar va tashqi axborot oqimini toʻxtatishga muvaffaq boʻlishsa, Isroil armiyasi oʻz harakatlarini hech qanday javobgarliksiz davom ettirishi mumkin deb hisoblayapti», — deya qoʻshimcha qildi Xon.

U shuningdek, Isroil okkupatsiya qilingan hududlarda jurnalistlar oʻldirilishi yuzasidan birorta ham mustaqil tergovga yoʻl qoʻymaganini taʼkidladi.

Maxsus maʼruzachi Rossiya va Ukraina oʻrtasidagi mojaroda 2022 yil fevraldan beri 14 jurnalist halok boʻlganini esga solib, Gʻazodagi vaziyatning koʻlami va yoʻqotishlari bilan butunlay boshqacha darajada ekanini qayd etdi.