Болаларга нисбатан зўравонлик учун умрбод қамоқ жазоси бўйича қонун лойиҳаси қабул қилинди

Ҳужжатга кўра, 14 ёшга тўлмаган болаларга нисбатан номусга тегиш ва жинсий эҳтиёжни зўрлик билан ғайритабиий усулда қондириш жиноятлари учун 25 йилгача ёки умрбод озодликдан маҳрум қилиш жазоси белгиланмоқда. 

Шунингдек, зўравонликдан жабрланган болаларни сўроқ қилишни видеоёзувга олиш ва уларга давлат ҳисобидан юридик ёрдам кўрсатиш назарда тутилган.

Қонун лойиҳаси билан 5 та кодекс ва 7 та қонунга ўзгартириш ва қўшимчалар киритиш назарда тутилган. У болаларни зўравонликдан ҳимоя қилиш, уларнинг ҳуқуқ ва манфаатларини кафолатлаш ҳамда масъул давлат органлари ва ташкилотларининг жавобгарлигини кучайтиришга қаратилган. 

"Бугун муҳокама қилинаётган қонун ҳаётимизнинг мазмуни бўлган болаларга, уларнинг ҳимоясига, эркинлигига, шаъни ва қадр-қимматига қаратилган. Умид қиламанки, бу қонун барчамизни ҳушёрликка чақиради. Бола манфаатларини ҳимоя қилишда мустаҳкам қалқон бўлиб хизмат қилади", — деди Демократик институтлар ва фуқаролик жамиятини ривожлантириш масалалари қўмитаси раиси Гулруҳ Агзамова.