«Диний экстремизм» атамаси қонунчиликдан чиқарилади – Сенат

Ўзбекистон Олий Мажлиси Сенати экстремизмга қарши курашиш самарадорлигини оширишга қаратилган қонунни маъқуллади. Сенатнинг расмий маълумотига кўра, ҳужжат билан экстремизмга қарши курашиш соҳасидаги ҳуқуқий механизмларни такомиллаштириш назарда тутилган.

Айрим қилмишлар учун биринчи марта маъмурий жавобгарлик

Янги тартибга кўра, экстремизм, сепаратизм ёки ақидапарастлик ғоялари билан йўғрилган материалларни тайёрлаш ҳамда уларни тарқатиш мақсадида сақлаш билан боғлиқ айрим қилмишлар биринчи марта содир этилганда маъмурий жавобгарликка сабаб бўлади.

Шунингдек, экстремистик ва террорчилик ташкилотларининг атрибутлари ёки рамзий белгилари тарқатиш ёки намойиш қилиш мақсадида тайёрланган ва сақланган ҳолатларга нисбатан ҳам шу ёндашув қўлланиши белгиланмоқда.

Бундай қилмиш маъмурий жазодан кейин яна такрорланса, жиноий жавобгарлик юзага келиши назарда тутилган.

Сенат маълумотига кўра, бундай ёндашув қонунбузарликни биринчи марта, жумладан, билмасдан ёки адашиб содир этган шахсга хатосини тузатиш имконини бериш ва унинг жамиятга қайта мослашувига кўмаклашишга қаратилган.

Тақиқланган ташкилот аъзоси ва раҳбарига турлича жавобгарлик

Қонун билан экстремистик, сепаратистик, фундаменталистик ва бошқа тақиқланган ташкилотлар билан боғлиқ қилмишлар учун жазоларни табақалаштириш ҳам таклиф этилмоқда.

Бунда шахснинг ташкилотдаги ўрни ва содир этган қилмишининг ижтимоий хавфлилик даражаси ҳисобга олинади.

Яъни ташкилотни тузган ёки унга раҳбарлик қилган шахс билан унинг фаолиятида иштирок этган шахсга нисбатан бир хил жавобгарлик қўллаш амалиётидан воз кечиш кўзда тутилмоқда.

«Диний экстремизм» ўрнига «экстремизм»

Қонунчиликдаги асосий ўзгаришлардан бири — «диний экстремизм» атамасини «экстремизм» тушунчаси билан алмаштириш.

Сенатнинг таъкидлашича, бу орқали экстремизмни муайян дин билан боғлаш амалиётига чек қўйиш ва ҳуқуқни қўллашда ягона ёндашувни шакллантириш мақсад қилинган.

Шу билан бирга, «экстремизм» тушунчасига аниқ ҳуқуқий таъриф бериш кўзда тутилмоқда. Бу ҳуқуқни қўллаш амалиётида мазкур тушунчанинг ҳаддан ташқари кенг ёки субъектив талқин қилинишига йўл қўймасликка қаратилган.

Экстремизм ҳақида хабар берган фуқаролар ҳимоя қилинади

Қонун экстремистик фаолият ёки таҳдидлар ҳақида ҳуқуқни муҳофаза қилувчи органларга ўз вақтида хабар берган шахслар учун қатор кафолатларни ҳам назарда тутади.

Уларнинг шахсий маълумотлари сир сақланиши, зарур ҳолларда хавфсизлигини таъминлаш чоралари кўрилиши белгиланмоқда.

Шунингдек, экстремизмнинг олдини олиш бўйича давлат дастурларини ишлаб чиқиш ва экстремистик ташкилотлар ҳамда материалларнинг ягона электрон реестрини юритиш механизмларини жорий этиш назарда тутилган.