Ботаника боғида велосипед ва самокатлар тақиқланади

Ушбу қарор боғ маъмурияти томонидан қабул қилинган.

Маълум қилинишича, боғ ҳудуди “хавфсиз ҳудуд” сифатида эълон қилиниб, бу ерда пиёдалар учун қулай ва сокин муҳит яратиш устувор вазифа этиб белгиланган. Шу сабабли барча турдаги икки ғилдиракли воситалар ҳаракати чекланмоқда.

“Сўнгги пайтларда велосипед ва самокатларда ҳаракатланаётганлар билан пиёдалар ўртасида нохуш ҳолатлар кўпайди. Айниқса, болалар ва кексалар хавфсизлиги жиддий эътибор талаб қилмоқда”, дейилади Боғ маъмурияти хабарида.

Шунингдек, фуқаролар ҳам боғда бемалол сайр қилиш, фарзандлари билан хавфсиз дам олиш учун шароит яратилишини сўраб мурожаат билан чиққан.

Мазкур чеклов орқали боғнинг асосий вазифаси — илмий ва экологик ҳудуд сифатидаги муҳитни сақлаш ҳам кўзда тутилган.

“Ботаника боғи, аввало, дам олиш ва табиатдан завқланиш маскани. Бу ерда тинчлик ва тартиб устувор бўлиши керак,” — дея қўшимча қилган боғ раҳбарияти.

Маълумот учун, пойтахтдаги Ботаника боғида велосипед ва самокатларда ҳаракатланиш 2021 йилда ҳам тақиқланган, кейинчалик эса яна рухсат берилган эди.

Ҳозирги кунда Ўзбекистонда 3 та ботаника боғи мавжуд бўлиб, яна 12 та ботаника ва 16 та дендрология боғини ташкил этиш режалаштирилган. 

2028 йилга қадар Қорақалпоғистон Республикаси, барча вилоятлар ва Тошкент шаҳрида майдони 100 гектардан кам бўлмаган ботаника ва дендрология боғларини ташкил этиш мақсад қилинган.