Оҳангарондаги ҳолат: ППХ ходимига қўйилган айбловлар рад этилди

Бу ҳақда Тошкент вилояти ИИББ маълум қилди.

Маълум қилинишича, 27 апрель куни тунги соат 00:40 атрофида ППХ ходимига унинг 22 ёшли аёл таниши қўнғироқ қилиб, маслаҳат сўраб чақирган. Ходим етиб келганида, аёл ва унинг 14 ёшли таниши бирга машинага чиққан.

Идора маълумотига кўра, айнан шу вақтда 18 ёшли йигит бир неча танишлари билан келиб, ходимни ҳақорат қилган ва жанжал чиқарган. Ушбу шахс 14 ёшли қизга қариндош эмаслиги ҳам таъкидланган.

Расмийларга кўра, ижтимоий тармоқларда тарқалган тегажоғлик ҳақидаги иддаолар ҳақиқатга тўғри келмайди. Ҳозирда ҳолат юзасидан текширув ишлари давом этмоқда.

Шунингдек, вояга етмаган шахс иштирок этгани сабабли иш тафсилотлари тўлиқ очиқланмаган. Тергов якунларига кўра, ёлғон ахборот тарқатган шахсларга нисбатан маъмурий ёки жиноий жавобгарлик чоралари кўрилиши мумкин.