“Ўзбекистон Ғазода мактаб ва шифохоналар қуришга тайёр” — Мирзиёев

АҚШ пойтахтида жойлашган Дональд Трамп номидаги Тинчлик институтида “Тинчлик кенгаши”нинг инаугурация саммити бўлиб ўтди. Нуфузли анжуманда сўзга чиққан Ўзбекистон раҳбари глобал хавфсизлик ва минтақавий барқарорлик масалаларига тўхталиб, Ғазо секторини тиклаш бўйича Ўзбекистоннинг қатъий позициясини билдирди.

Президент ўз нутқида мазкур мулоқот майдонини ташкил этгани учун АҚШ Президенти Дональд Трампга миннатдорлик билдирди. Унинг таъкидлашича, саммитнинг ўтказилиши юксак сиёсий ирода ва халқаро муаммоларга прагматик ёндашув самарасидир.

Шавкат Мирзиёев Ғазони ижтимоий-иқтисодий жиҳатдан тиклаш масаласига алоҳида эътибор қаратиб, ҳудудни бошқариш бўйича ҳар қандай ташқи механизм, аввало, маҳаллий аҳолининг қўллаб-қувватловига таянишини қайд этди. Барча томонларнинг мувофиқлаштирилган саъй-ҳаракатлари можародан кейинги жараёнларни барқарорлаштиришда ҳал қилувчи аҳамият касб этиши таъкидланди.

Президент Ўзбекистон Ғазо ҳудудида ҳаётий муҳим объектлар қурилишига амалий ҳисса қўшишга тайёр эканини маълум қилди. Жумладан, қуйидаги йўналишларда лойиҳаларни амалга ошириш режалаштирилмоқда:

• замонавий турар жой мажмуалари;
• мактабгача таълим муассасалари ва мактаблар;
• тиббиёт муассасалари ва шифохоналар.

“Ғазонинг ҳар қандай ташқи бошқарув механизми сектор аҳолисининг сўзсиз ички қўллаб-қувватлашига таяниши лозим. Барча томонларнинг мувофиқлаштирилган саъй-ҳаракатлари ҳудудни тез фурсатда қайта тиклаш ва барқарорликни таъминлашга хизмат қилади. Ўзбекистон ушбу жараёнда турар жойлар, болалар боғчалари, мактаб ва касалхоналар барпо этишга имкон қадар ҳисса қўшишга тайёр”, — деди давлат раҳбари.

Ушбу ташаббус Ўзбекистоннинг халқаро майдондаги масъулиятли ва тинчликпарвар давлат сифатидаги нуфузини янада мустаҳкамлайди. Вайрон бўлган ижтимоий инфратузилмани тиклаш эса минглаб инсонлар ҳаётини барқарор изга солиш ва узоқ муддатли тинчликни таъминлашга хизмат қилади.