Ноқонуний муомалада бўлган 3 мингдан ортиқ газ баллони ва улардаги 13 636 килограмм суюлтирилган газ ашёвий далил сифатида олинди.

Давлат хавфсизлик хизмати, Ички ишлар вазирлиги, Бош прокуратура, Фавқулодда вазиятлар вазирлиги ва «Ўзэнергоинспекция» ходимлари аҳоли учун ажратилган суюлтирилган газни ноқонуний сотиш ҳолатларини аниқлаш мақсадида республика бўйлаб рейдлар ўтказди.

Рейдларда айрим газ таъминоти ходимлари ва фуқаролар давлат томонидан аҳолига ажратилган газ баллонларини яширинча сақлаб, қиммат нархларда сотишга урингани аниқланди.

Жумладан, Жиззах вилоятида 9 та ҳолатда сотиш мақсадида ноқонуний сақланган 239 та газ баллони топилди. Зомин тумани газ таъминоти бўлимида аввал юқори лавозимда ишлаган шахс қариндошига тегишли хонадонда 152 та газ баллонини яширинча сақлаган.

Сирдарё вилоятида Ховос тумани газ таъминоти бўлими мансабдорларидан бирининг уйидан ҳужжатларсиз сақланган 30 та газ баллони олинди.

Самарқанд вилоятининг Ургут туманида газ тўлдириш шохобчаси қоровули газ тўлдирилган 3 та баллонни 2,5 миллион сўмга сотаётган вақтда ушланган. Пастдарғом туманида эса бир фуқаронинг уйидан газ тўлдирилган 22 та баллон топилган. Маълум бўлишича, у баллонларни газ таъминоти бўлими ҳайдовчисидан 70 минг сўмдан олиб, аҳолига 100 минг сўмдан сотган.

Фарғона вилоятида Қўштепа тумани газ таъминоти бўлимининг муҳандиси ва чилангари аҳоли учун мўлжалланган 8 та газ баллонини ўз уйларида ноқонуний сотиш мақсадида сақлагани аниқланган.

Сурхондарё вилоятининг Бандихон туманида яшовчи фуқаро газ таъминоти бўлими ҳайдовчисидан 70 минг сўмдан сотиб олган 32 та баллонни қимматроқ нархда сотишга уринган. Навоий вилоятининг Хатирчи туманида эса газ таъминоти бўлими ҳайдовчисининг уйидан 26 та газ баллони олинган.

Шунга ўхшаш қонунбузилиш ҳолатлари Қорақалпоғистон Республикаси, Хоразм ва Наманган вилоятларида ҳам аниқланган.

Масъул идоралар аҳоли учун ажратилган суюлтирилган газнинг ноқонуний савдосига қарши рейдлар давом эттирилишини маълум қилди. Фуқаролардан бундай ҳолатларга дуч келганда Давлат хавфсизлик хизматининг 1520 қисқа рақамига хабар бериш сўралган.