Қашқадарёда фермернинг ери ўзидан бехабар аукционга чиқарилди

Бу ҳақда Бизнес-омбудсман матбуот хизмати хабар қилди.

Маълум қилинишича, вилоятнинг Кўкдала туманида фаолият юритаётган “A.M.Ch.” фермер хўжалигига тегишли ер майдонини зaxирага қайтариш тўғрисидаги қарордан норози бўлиб, Бизнес-омбудсманга мурожаат қилган.

Ўрганишлар давомида халқ депутатлари туман кенгаши қарори билан фермер хўжалигига тегишли 500 гектар ер майдони “ўз хоҳиши билан қайтарилган” деган асосда давлат зaxирасига олингани ва аукционга чиқарилгани аниқланган. Бироқ фермер томонидан ердан воз кечиш бўйича нотариал тасдиқланган ариза берилмаган.

Қайд этилишича, 2022 йил 1 сентябрдан бошлаб ер участкасидаги ҳуқуқдан ихтиёрий равишда воз кечиш ҳолатларида ушбу ҳуқуқни бекор қилишни Вазирлар Маҳкамаси ёки маҳаллий давлат ҳокимияти органлари қарорлари билан расмийлаштириш амалиёти бекор қилинган. Ҳозирда ер участкасидан ихтиёрий воз кечиш тўғрисидаги нотариал тасдиқланган ариза ерга бўлган ҳуқуқларни бекор қилиш учун ягона асос ҳисобланади.

Мазкур ҳолат юзасидан Қашқадарё вилояти халқ депутатлари кенгаши томонидан қуйи бўғин кенгашининг ноқонуний қарори бекор қилинди.