Қорақалпоғистонда яширин цех фош этилди

Бош прокуратура ҳузуридаги Иқтисодий жиноятларга қарши курашиш департаменти Қорақалпоғистон Республикасининг Нукус шаҳри бўлими ва ДХХ ходимлари ҳамкорлигида ўтказилган тезкор тадбирда Элликқалъа туманида аниқланган яширин цехдан 2 мингдан зиёд қалбаки акциз марка олинди.

Жумладан фуқаролар Ш.Р. ва С.К. “Мустақиллик” овул фуқаролар йиғини ҳудудидаги хонадонда яширин равишда қўлбола усулда алкоголь маҳсулотлари ишлаб чиқариш билан шуғулланиб келганлиги аниқланди.

Тезкор тадбир давомида улардан 2 минг 215 дона қалбаки акциз марка, 1 минг 357 дона қопқоқ, 2 минг 800 дона целлофан қадоқ, 1 минг 539 дона лента, 700 дона бўш шиша идиш, 205 дона қўлбола алкоголь маҳсулоти, 6 дона ампициллин дори воситаси ва ишлаб чиқаришда фойдаланилган бошқа маҳсулотлар ашёвий далил сифатида олинди.

Мазкур ҳолат юзасидан Жиноят кодексининг тегишли моддалари билан жиноят иши қўзғатилиб, тергов ҳаракатлари олиб борилмоқда.