Qoraqalpogʻistonda yashirin sex fosh etildi

Bosh prokuratura huzuridagi Iqtisodiy jinoyatlarga qarshi kurashish departamenti Qoraqalpogʻiston Respublikasining Nukus shahri boʻlimi va DXX xodimlari hamkorligida oʻtkazilgan tezkor tadbirda Ellikqalʼa tumanida aniqlangan yashirin sexdan 2 mingdan ziyod qalbaki aksiz marka olindi.

Jumladan fuqarolar Sh.R. va S.K. “Mustaqillik” ovul fuqarolar yigʻini hududidagi xonadonda yashirin ravishda qoʻlbola usulda alkogol mahsulotlari ishlab chiqarish bilan shugʻullanib kelganligi aniqlandi.

Tezkor tadbir davomida ulardan 2 ming 215 dona qalbaki aksiz marka, 1 ming 357 dona qopqoq, 2 ming 800 dona sellofan qadoq, 1 ming 539 dona lenta, 700 dona boʻsh shisha idish, 205 dona qoʻlbola alkogol mahsuloti, 6 dona ampitsillin dori vositasi va ishlab chiqarishda foydalanilgan boshqa mahsulotlar ashyoviy dalil sifatida olindi.

Mazkur holat yuzasidan Jinoyat kodeksining tegishli moddalari bilan jinoyat ishi qoʻzgʻatilib, tergov harakatlari olib borilmoqda.