Туғруқ масканининг ачинарли аҳволи: Саида Мирзиёева ҳолатни ўрганди

«Соғлиқни сақлашдаги муаммоларни фақат ҳисоботлар орқали баҳолаб бўлмайди, буни жойида кўриш мумкин», — деди Президент Администрацияси раҳбари тиббиёт муассасалари фаолияти билан танишув чоғида.

Самарқанд вилояти Ургут туманида 1972 йилда қурилган мазкур бино ҳозирда 13 мингдан ортиқ аҳолига хизмат кўрсатиб, 16 та қишлоқ учун ягона туғруқ маскани ҳисобланади. Шунга қарамасдан, муассасанинг моддий-техник ҳолати замонавий талабларга жавоб бермайди.

Президент Администрацияси раҳбарининг таъкидлашича, тиббиёт муассасасидаги юклама ниҳоятда катта, мавжуд шароит эса, жумладан, кабинетлардан сув томчилаб оқаётгани, қўшимча изоҳ талаб қилмайди. 

Шу муносабат билан диагностика, даволаш жараёнлари ҳамда тиббий кадрлар тайёрлаш стандартларини қайта кўриб чиқиш зарурлиги қайд этилди. Мутасаддиларга мавжуд камчиликларни бартараф этиш ва тиббий хизмат сифатига алоҳида эътибор қаратиш бўйича топшириқлар берилди.