Ўзбекистонда озиқ-овқат нархлари инфляциядан тезроқ ўсмоқда

Ўзбекистонда озиқ-овқат маҳсулотлари ва аҳоли учун зарур хизматлар нархлари умумий инфляция суръатидан анча юқори ўсмоқда.

Марказий банк раиси Тимур Эшметовнинг маълум қилишича, банк тегишли вазирлик ва идоралар билан ҳамкорликда асосий маҳсулотлар нархларини барқарорлаштириш бўйича амалий чоралар кўрмоқда. Унинг таъкидлашича, аҳоли харажатларининг катта қисмини ташкил этувчи ижтимоий аҳамиятга эга товарлар ва хизматлар нархи умумий инфляция даражасидан анча юқори ўсишда давом этмоқда.

Охирги бир йил ичида:
– гўшт нархи 23,2% га,
– картошка нархи 18,5% га,
– бензин эса 11,8% га қимматлаган.

Эшметовнинг таъкидлашича, келгусида инфляцияни паст ва барқарор даражада ушлаб туриш учун таклиф билан боғлиқ фундаментал омилларни бартараф этиш зарур.

У устувор вазифалар сифатида қуйидагиларни қайд этди:
– ички бозорда рақобатни ривожлантириш,
– тариф ва нотариф тўсиқларни камайтириш,
– товарлар импортида концентрацияни пасайтириш,
– энергия ресурсларининг барқарор етказиб берилишини таъминлаш,
– транспорт инфратузилмасини мустаҳкамлаш.