АҚШда ишлаш учун хорижлик талабадан 100 минг доллар талаб қилинади

АҚШ Миллий хавфсизлик вазирлиги хорижлик талабаларга мамлакатда ишлаш имконини берувчи Optional Practical Training (OPT) дастури учун янги тўловлар жорий этишни таклиф қилди. 

Таклифга кўра, F-1 визасидаги талаба учун OPT дастуридаги дастлабки амалиётга рухсат бериш учун 70 минг доллар, кейинги қўшимча амалиёт даври учун эса 30 минг доллар тўлов олиниши мумкин. Шу тариқа умумий харажат 100 минг долларга етиши мумкин.

Ҳозирда ушбу тўлов тахминан 500 долларни ташкил этади.

OPT дастури хорижлик талабаларга ўқиш вақтида ҳафтасига 20 соатгача, шунингдек, ўқишни тугатгандан кейин маълум муддат давомида ўз мутахассислиги бўйича амалиёт ўташ ва ишлаш имконини беради. STEM — фан, технология, муҳандислик ва математика йўналишлари битирувчилари учун қўшимча муддат ҳам мавжуд.

Вазирлик янги тўловлар фирибгарликка қарши курашиш, иммиграция тизими яхлитлигини мустаҳкамлаш ва америкалик ишчилар манфаатларини ҳимоя қилишга қаратилганини билдирган.

Таклиф жамоатчилик муҳокамаси учун 30 кунга тақдим этилади. Қоидалар якуний тасдиқланган тақдирда, уларни кучга киритишдан олдин яна 60 кунлик тайёргарлик муддати берилиши режалаштирилган.