Янги саноат зонаси аҳоли бандлигига хизмат қилмоқда

Ўзбекистонда тадбиркорларга шароит яратиш ва аҳоли бандлигини таъминлаш мақсадида технопарк ва кичик саноат зоналари ташкил этилмоқда. Наманганда ҳозирги кунда 73 та саноат зонаси фаолият юритмоқда.

“Ғиждувон тажрибаси” асосида 10 гектар майдонда ташкил этилган “Тараққиёт” зонасида 113 та лойиҳа жойлаштирилган. Унинг инфратузилмаси давлат ҳисобидан барпо этилган. Натижада йилига 500 миллиард сўмлик маҳсулот ишлаб чиқариш қуввати ва 4,8 мингта янги иш ўрни яратилди.

Бу ерда ишсизларни қайта касбга ўқитиш имконияти ҳам мавжуд бўлиб, аҳоли иқтисодий фаоллиги ошмоқда. Президент автомобилларга техник хизмат кўрсатиш марказлари фаолияти билан танишиб, сервис соҳасини ривожлантириш зарурлигини таъкидлади.

Шунингдек, мебел ишлаб чиқариш кўргазмаси кўздан кечирилди. Ёшларни иш билан таъминлаш, маҳаллий саноатни ривожлантириш ва замонавий меҳнат шароитларини яратиш бўйича топшириқлар берилди.