Афғонистонда Жаҳон банки фаолияти қайта тикланди — «Толибон»

Бу ҳақда Afghanistan International хабар берди.

Жаҳон банки ҳозирча расмий изоҳ бермаган. Бироқ «Толибон» томони Жаҳон банки пудратчи компанияларнинг 45 миллион доллар миқдоридаги қарзларини тўлаб беришни ўз зиммасига олганини билдирган. Молия вазирлиги баёнотига кўра, банк 2021 йил августидан олдин ҳужжатлари расмийлашган ва якунланган лойиҳалар бўйича тўловларни амалга ошириш мажбуриятини қабул қилган.

Афғонистон Ислом Республикаси қулаганидан ва ҳукумат «Толибон» қўлига ўтганидан кейин Жаҳон банки мамлакатдаги фаолият шаклини ўзгартирган эди. Шу вақтдан бери у «Толибон» назоратидаги давлат идоралари билан тўғридан-тўғри ҳамкорликни тўхтатган, ёрдамларни эса асосан ЮНИСЕФ, Жаҳон озиқ-овқат дастури ва Афғонистонни қайта қуриш жамғармаси орқали йўналтириб келган. Бунинг мақсади молиявий ёрдамнинг тўғридан-тўғри аҳолига етиб боришини таъминлаш эди.

Тўрт босқичли тўлов жараёни

«Толибон» Молия вазирлигига кўра, Жаҳон банки билан тузилган шартномалар бўйича бир қатор лойиҳалар ва компанияларга тўловларни қайтариш жараёни бошланган. Уларнинг ҳужжатлари Жаҳон банки мониторинг гуруҳи ва Молия вазирлиги томонидан кўриб чиқилган.

Қарзларни қоплаш қуйидаги тўрт босқичда амалга оширилади:

– биринчи босқичда 9,3 миллион доллар тўғридан-тўғри хорижий пудратчи компанияларга тўланади;
– иккинчи босқичда Жаҳон банки 16,8 миллион долларни «Толибон» Молия вазирлиги орқали пудратчиларга тўлиқ ўтказади.

Молия вазирлиги маълумотига кўра, тўловларнинг дастлабки икки босқичи амалда бошланган, учинчи ва тўртинчи босқичлар ҳам тез орада йўлга қўйилади.