AQSh Netanyahuning “Gʻazoni toʻliq egallash rejasi” borasida sukut saqlamoqda

Davlat departamentidagi matbuot anjumanida idoraning rasmiy vakili Temmi Bryus Isroil rejalari va ularning AQSh siyosatiga mosligi haqidagi savollarga javob berishdan tiyildi.

«Isroil rejalari va hozirgi xabarlarga kelsak, men sizlarni Isroil hukumatiga murojaat qilishga chorlayman. Biz xorijiy hukumatlarning bayonotlarini izohlamaymiz», — dedi Bryus.

Jurnalist tomonidan berilgan Isroilning Gʻazoda harbiy harakatlarni yanada kuchaytirigi AQSh prezidenti Donald Trampning urushni tugatishga qaratilgan bayonotlariga zid emasmi, degan savolga Bryus shunday javob berdi:

«Men Isroil rejalari haqida gapirmayman. Hozir turli xabarlar tarqalmoqda. Men boshqa hukumatlarning harakatlarini muhokama qilmayman. Ayta oladigan yagona narsa shuki, Tramp maʼmuriyati bu masalada juda jiddiy ishlamoqda. U (Tramp) urushni tugatishni istaydi».

Bundan avval Isroilning davlat telekanali boʻlmish KAN oʻz manbalariga tayanib, Netanyahu Gʻazoni toʻliq egallash rejasini maʼqullayotganini xabar qilgandi. Ammo kanal maʼlumotiga koʻra, Isroil qurolli kuchlari (SAXAL) bosh shtabi rahbari Eyal Zamir bunday rejaga qarshi chiqqan.

Bunga javoban Netanyahu ofisi Zamirga shunday mazmunda javob qaytargan:

«Agar Gʻazoni toʻliq okkupatsiya qilish rejasi sizga mos kelmasa, isteʼfoga chiqishingiz kerak».