AQSh sogʻligʻi yomon boʻlgan shaxslarga viza berishni toʻxtatadi

 Bu haqda Telegram’dagi «Caucasian Bureau» kanali va qator xalqaro OAV xabar berdi.

«Ijtimoiy yuk» tamoyili AQSh immigratsiya qonunchiligida 1882 yildan beri mavjud boʻlib, oʻzini taʼminlay olmaydigan yoki davlat yordamiga muhtoj boʻlishi mumkin boʻlgan shaxslarga viza berilmasligini nazarda tutadi. Yangi siyosat shu qoida doirasini kengaytirib, sogʻliq bilan bogʻliq omillarni ham asosiy baholash mezoni sifatida kiritmoqda.

Xabarlarga koʻra, AQSh Davlat departamenti va Sogʻliqni saqlash departamenti immigratsiya hamda nodavlat vizalarni koʻrib chiqishda sogʻliq holatini asosiy omil sifatida baholash toʻgʻrisida yangi koʻrsatma ishlab chiqmoqda. Shu bilan, konsullik xodimlari viza arizasi berilgan shaxsning sogʻligʻi davlat yordamiga muhtoj boʻlishi ehtimolini baholaydi va bu holat rad etish uchun asos boʻlishi mumkin.

«San Francisco Chronicle» va «ABC News» nashrlarining yozishicha, ushbu siyosat Donal Tramp maʼmuriyati tomonidan taklif qilingan boʻlib, uning asosiy maqsadi — immigratsiya tizimini qatʼiylashtirish va davlat xarajatlarini qisqartirish hisoblanadi. «Times of India» nashri esa bu siyosatni «AQSh semizlik va sogʻliq holatlarini viza rad etish asosiga aylantirmoqda» deya baholagan.

Biroq inson huquqlari tashkilotlari bu qarorni tanqid qilib, uni diskriminatsion va axloqiy jihatdan ziddiyatli deb atadi. Mutaxassislar fikricha, bunday siyosat sogʻligʻi yomon boʻlgan odamlarning davlat yordamidan qoʻrqib davolanishdan voz kechishiga sabab boʻlishi mumkin.

Hozircha siyosatning aniq amalga kirish sanasi haqida rasmiy maʼlumot berilmagan. Ammo mutaxassislar fikricha, agar yangi qoidalar kuchga kirsa, AQSh vizasiga murojaat qiluvchilardan toʻliq tibbiy maʼlumotnoma va moliyaviy kafolat hujjatlari talab qilinishi mumkin.