АҚШ соғлиғи ёмон бўлган шахсларга виза беришни тўхтатади

АҚШ ҳукумати айрим касалликларга чалинган хорижлик фуқароларга виза беришни чеклаш ҳақидаги янги сиёсатни жорий этишни режалаштирмоқда. Маълумотларга кўра, янги тартибга биноан семизлик, диабет, саратон ва юрак-қон томир касалликларига чалинган шахслар «ижтимоий юк» («public charge») деб баҳоланиши мумкин ва уларнинг виза олиш эҳтимоли кескин пасаяди.

Жаҳон

10.11.2025, 09:44

Lotinchada

Улашиш:

Бу ҳақда Telegram’даги «Caucasian Bureau» канали ва қатор халқаро ОАВ хабар берди.

«Ижтимоий юк» тамойили АҚШ иммиграция қонунчилигида 1882 йилдан бери мавжуд бўлиб, ўзини таъминлай олмайдиган ёки давлат ёрдамига муҳтож бўлиши мумкин бўлган шахсларга виза берилмаслигини назарда тутади. Янги сиёсат шу қоида доирасини кенгайтириб, соғлиқ билан боғлиқ омилларни ҳам асосий баҳолаш мезони сифатида киритмоқда.

Хабарларга кўра, АҚШ Давлат департаменти ва Соғлиқни сақлаш департаменти иммиграция ҳамда нодавлат визаларни кўриб чиқишда соғлиқ ҳолатини асосий омил сифатида баҳолаш тўғрисида янги кўрсатма ишлаб чиқмоқда. Шу билан, консуллик ходимлари виза аризаси берилган шахснинг соғлиғи давлат ёрдамига муҳтож бўлиши эҳтимолини баҳолайди ва бу ҳолат рад этиш учун асос бўлиши мумкин.

«San Francisco Chronicle» ва «ABC News» нашрларининг ёзишича, ушбу сиёсат Дональ Трамп маъмурияти томонидан таклиф қилинган бўлиб, унинг асосий мақсади — иммиграция тизимини қатъийлаштириш ва давлат харажатларини қисқартириш ҳисобланади. «Times of India» нашри эса бу сиёсатни «АҚШ семизлик ва соғлиқ ҳолатларини виза рад этиш асосига айлантирмоқда» дея баҳолаган.

Бироқ инсон ҳуқуқлари ташкилотлари бу қарорни танқид қилиб, уни дискриминацион ва ахлоқий жиҳатдан зиддиятли деб атади. Мутахассислар фикрича, бундай сиёсат соғлиғи ёмон бўлган одамларнинг давлат ёрдамидан қўрқиб даволанишдан воз кечишига сабаб бўлиши мумкин.

Ҳозирча сиёсатнинг аниқ амалга кириш санаси ҳақида расмий маълумот берилмаган. Аммо мутахассислар фикрича, агар янги қоидалар кучга кирса, АҚШ визасига мурожаат қилувчилардан тўлиқ тиббий маълумотнома ва молиявий кафолат ҳужжатлари талаб қилиниши мумкин.

Жаҳон

10.11.2025, 09:44

Улашиш:

#ақш #тақиқ #виза

мавзуга оид янгиликлар