AQShda boʻron: kamida 7 kishi halok boʻldi, 1 milliondan ortiq aholi chiroqsiz qoldi

Mamlakatning sharqiy va janubiy hududlarini qor boʻroni, muzli yomgʻir va oʻta past harorat qamrab olgan.

Maʼlumotlarga koʻra, Meksika qoʻltigʻi qirgʻoqlaridan tortib mamlakatning shimoli-sharqiy hududlarigacha boʻlgan keng hududda ob-havo keskin yomonlashgan. Shu sababli 10 mingdan ortiq aviareyslar bekor qilingan, bir qator shtatlarda favqulodda holat eʼlon qilindi.

Xususan, Luiziana shtatda ikki kishi qattiq sovuq — gipotermiya oqibatida vafot etgani tasdiqlangan. Nyu-York shahri meri Zohran Mamdani koʻchalardan kamida besh kishining jasadi topilganini maʼlum qildi. Aytilishicha, halok boʻlganlarning aksariyati boshpanasiz shaxslardir.

AQSh prezidenti Donald Tramp Janubiy Karolina, Virjiniya, Jorjiya va Luizianani oʻz ichiga olgan 12 ta shtatda federal favqulodda holat rejimini tasdiqladi. U “Truth Social” ijtimoiy tarmogʻida aholini ehtiyotkorlikka chaqirib, issiq joylarda qolishni soʻradi.

Milliy ob-havo xizmatiga koʻra, Yangi Angliya hududida qor qalinligi 45 santimetrgacha yetishi mumkin. AQSh Ichki xavfsizlik vazirligi rahbari Kristi Noem aholini yoqilgʻi va oziq-ovqat zaxirasini oldindan tayyorlab qoʻyishga chaqirdi. Mutaxassislar Nyu-York shahrida soʻnggi 8 yil ichidagi eng past harorat qayd etilayotganini taʼkidlamoqda.

Shu bilan birga, Rossiyaning Kamchatka oʻlkasida ham kuchli qor boʻronlari oqibatida ikki kishi halok boʻlib, mintaqada favqulodda holat rejimi joriy etilgan. Ayrim joylarda qor qalinligi binolarning ikkinchi qavatigacha yetib, aholining uylarida qamalib qolishiga sabab boʻlgan.

Rasmiy idoralar vaziyatni nazorat qilishda davom etmoqda.