АҚШда бўрон: камида 7 киши ҳалок бўлди, 1 миллиондан ортиқ аҳоли чироқсиз қолди

Мамлакатнинг шарқий ва жанубий ҳудудларини қор бўрони, музли ёмғир ва ўта паст ҳарорат қамраб олган.

Маълумотларга кўра, Мексика қўлтиғи қирғоқларидан тортиб мамлакатнинг шимоли-шарқий ҳудудларигача бўлган кенг ҳудудда об-ҳаво кескин ёмонлашган.

Хусусан, Луизиана штатда икки киши қаттиқ совуқ — гипотермия оқибатида вафот этгани тасдиқланган. Нью-Йорк шаҳри мэри Зоҳран Мамдани кўчалардан камида беш кишининг жасади топилганини маълум қилди. Айтилишича, ҳалок бўлганларнинг аксарияти бошпанасиз шахслардир.

АҚШ президенти Доналд Трамп Жанубий Каролина, Виржиния, Жоржия ва Луизианани ўз ичига олган 12 та штатда федерал фавқулодда ҳолат режимини тасдиқлади. У “Truth Social” ижтимоий тармоғида аҳолини эҳтиёткорликка чақириб, иссиқ жойларда қолишни сўради.

Миллий об-ҳаво хизматига кўра, Янги Англия ҳудудида қор қалинлиги 45 сантиметргача етиши мумкин. АҚШ Ички хавфсизлик вазирлиги раҳбари Кристи Ноэм аҳолини ёқилғи ва озиқ-овқат захирасини олдиндан тайёрлаб қўйишга чақирди. Мутахассислар Нью-Йорк шаҳрида сўнгги 8 йил ичидаги энг паст ҳарорат қайд этилаётганини таъкидламоқда.

Расмий идоралар вазиятни назорат қилишда давом этмоқда.